Vrasja e 19-vjeçarit Erjon Xhenje mbrëmë në Shkodër, teksa po pinte kafe në një lokal në bulevardin “Bujar Bishanaku”, ka tronditu mbarë vendin.
Paraprakisht policia dyshon se vrasja ka ndodhur për shkak të hakmarrjes mes fiseve në Lici dhe Bajri në Shkodër, ndërkohë që nuk ka të dhëna për të riun të jetë përfshirë në ndonjë ngjarje kriminale përveç faktit se shërbente në stallën e kuajve të Astmer Bilalit, një element i fisit Bajri.
Për ngjarjen ka reaguar dhe kushëriri i viktimës ku dhe ka bërë një apel të fortë ndaj qytetarëve. Përmes një postimi në FB, kushëriri i viktimës shprehet se nuk është vrarë asnjë kokë bande, por të gjithën e pësojnë njerëzit e thjeshtë. Ndër të tjera ai ka rrëfyer se viktima vinte nga një familje e thjeshtë që siguronte të ardhura me punë të ndershme.
“I riu i vrarë sot është djali i vajzës së tezes time. Vjen nga një familje e thjeshtë, e ëma mësuese, i ati ka punuar si shofer, është marrë me rritje bletësh dhe punë të ndryshme për të mbajtur familjen me djersë dhe me nder. Njerëz të qetë, të urtë e fjalë mirë. Sot marr vesh se i Erjoni paska punuar në një nga fermat e personave me precedent penale?! A është kjo arsye të vritet një 19-vjeçar?! Ne jetojmë në Shkodër e dimë mirë se kush i ka bizneset atje dhe si i kanë bërë. A duhet të jetë kaq e pa sigurtë jeta sa mund të rrezikohesh edhe po të shkosh në punë?!”, shkruan Qallija.
Po ashtu kushëriri i viktimës shkruan se në Shkodër ka prej vitesh përplasje bandash dhe as autoritetet nuk guxojnë të futen mes tyre.
“Shkodra ka vite që mbahet peng nga një luftë mes bandash me përkrahje politike majtas e djathtas. Banda që e kanë kthyer atë qytet më keq se Palermon dhe Policia e Shtetit nuk guxon të bëjë punen e saje sepse këta njerëz mbrohen nga lart për çdo gjë që bëjnë. Kryeministri ne një dalje për mediat tha: “Kokat e tyre hëngshin” edhe pse të gjithë e dimë se për çdo fushatë ai ha koka qengji me njërën nga bandat atje. Ndërsa bandën tjetër e ka lenë të gostisë opozitën. Në fakt me gjithë numrin e madh të të vrarëve në Shkodër, asnjë kokë bande nuk është vrarë. Janë vrarë vetëm qytetarë të pafajshëm, punëtorë ferme, punëtorë shezllonesh, shitës peshku, të cilët buka e gojës i ka çuar aty. Ka ardhur koha që qytetarët e Shkodrës ti bëjnë presion shtetit ti japi fund kësaj lufte mes bandash dhe jo të përkrahë banditë. Kjo që shikoni në vidéo është thirrja e dëshpëruar e një babai i cili ka humbur djalin e tij vetëm 19-vjeç. Nëse nuk reagoni sot, nesër mund të jetë fëmija juaj”, shkruan Qallija.
Ndërkohë, në dëshminë e dhënë në polici, i ati i viktimës raportohet të jetë shprehur: “Kam prej 1 jave që kërkoj shtëpi me qira. Ti largoj nga këtu. Nuk është problemi jonë por i nipave. Unë s’kam punë, skam lidhje me asgjë, nuk di asgjë”.
