Personi në foto është 19-vjeçari Erjon Xhenje, i cili u vra mbrëmjen e së Dielës në qytetin e Shkodrës, me armë zjarri, teksa pinte kafe në një lokal.
I riu, do të përcillet ditën e sotme për në banesën e fundit.
Xhenje i shërbente fermës dhe kuajve të Asmer Bilalit, një emër shumë i njohur në botën e krimit në qytetin verior.
Vrasja mendohet të jetë vazhdimësi e rivalitetit mes bandës së dy fiseve, Bajri dhe Lici.
Në lagjen “Zooteknike”, është gjetur i djegur në afërsi të portës së familjes Lici, motori që dyshohet se është përdorur nga autorët.
Xhenje u ekzekutua me breshëri plumbash, në brendësi të një lokali në lagjen “Kiras”.
Disa persona të paidentifikuar kanë qëlluar në drejtim të lokalit, duke e lënë të vdekur në vend të riun.
Erjon Xhenje pati një bisedë me të atin, rreth dy orë para se të ndodhte vrasja. Babai i kërkoi atij që të shkonte në shtëpi, pasi ishte errësuar.
I ati po shkonte në drejtim të Malit të Zi për t’u furnizuar me karburant, por diçka e ka penguar dhe është kthyer në banesë. Më pas, është informuar për ngjarjen e rëndë ku i biri ka mbetur i vdekur.
Gjatë komunikimit të tij me efetivë të policisë, babai u shpreh se djali i tij nuk kishte konflikte , por problemet i kishte nga kurshërinjtë e tij.
Shërbimet e Policisë Vendore dhe FNSH Shkodër vijojnë kontrollin e zonës për të bërë të mundur kapjen e autorëve.
Lexo edhe:
