Një ngjarje e rëndë ka tronditur qytetin e Shkodrës mbrëmjen e sotme.
Një person është vrarë me armë zjarri ndërsa ndodhej brenda një lokali në Bulevardin “Bujar Bishanaku”.
Burimet bëjnë me dije se viktima ka qenë duke pirë kafe në një lokal, ndërsa është qëlluar me armë.
Viktima është identifikuar si Erjon Xhenjo, 19 vjeç.
Ndërkohë mësohet se në vendngjarje deri tani jana gjetur të paktën 30 gezhoja plumbash. Çka tregon se ndaj viktimës është qëlluar me breshëri.
Deri në këto momente nuk ka informacion se kush mund te jenë autorët, ndërkohë burimet policore shpjegojnë se autorët kanë qenë me motorçikletë, e cila më pas u gjet e djegur bashkë me një armë zjarri.
Policia ndodhet në vendngjarje dhe po heton mbi ngjarjen e rëndë.
Njoftimi i policisë:
Rreth orës 20:10, në bulevardin “Bujar Bishanaku”, në lagjen “Naim Gjylbegu”, në një lokal, në rrethana ende të paqarta, është vrarë me armë zjarri shtetasi E. Xh., 19 vjeç, banues në Shkodër.
Shërbimet e Policisë janë vënë në ndjekje të autorëve, të cilët janë larguar me një motoçikletë.
Në lagjen “Guerrile” është gjetur nje motoçikletë duke u djegur dhe një armë zjarri pistoletë, që dyshohet se janë përdorur nga autorët.
Grupi hetimor nën drejtimin e Prokurorisë ndodhet në vendngjarje dhe vijon punën për zbardhjen e rrethanave të ngjarjes dhe identifikimin e autorëve.
Shërbimet e Policisë Vendore dhe FNSH Shkodër vijojnë kontrollin e zonës për të bërë të mundur kapjen e autorëve.
