Partia Socialiste ka akuzuar kreun e opozitës, Lulzim Basha, se është duke e çuar vendin drejt dhunës, njësoj si në 1997-ën.
Me anë të një reagimi, PS thekson se Basha nuk mund të pretendojë krejt papritur se është një qingj i pafajshëm, ndërsa e paralajmëron se nuk do të lejohet bllokimi i zgjedhjeve të 18 qershorit.
Reagimi i PS:
Është koha që Basha të mësojë se: Ai që bënte thirrje vetëm pak ditë më parë për të thyer dritaret e për të shpuar gomat, nuk mund të pretendojë krejt papritur e pakujtuar se është thjesht një qingj i pafajshëm. Çadra e Bashës e ka vonuar mjaft tashmë zbatimin e Reformës në Drejtësi dhe rrezikon ta nxjerrë Shqipërinë nga rruga drejt BE-së.
Kërcënimet e tij për bllokimin e rrugëve dhe bojkotin e zgjedhjeve janë një rrugë e rrezikshme që na çon pashmangshmërisht vetëm drejt dhunës, pikërisht ashtu si në 1997-n. Ne nuk do ta lejojmë PD-në t’ju marrë peng të ardhmen shqiptarëve. Në 18 Qershor, qytetarët do të jenë të lirë të shprehin vullnetin për zgjedhjen e tyre.
