Ministri i Drejtësisë Petrit Vasili i ftuar në emisionin “Kjo Javë” e gazetares Nisida Tufa në News 24, ndryshe nga kryeministri Rama që thotë se nuk ka krizë politike, është shprehur “se jemi në një krizë politike”.
Vasili ka bërë një deklaratë të fortë përballë gazetares ndërsa është pyetur nëse e synon LSI postin e kryeministrit të vendit.
Ku Vasili është shprehur se forca politike ku ai bën pjesë do ta kërkojë postin e kryeministrit në bazë të rezultatit që do të ketë në zgjedhjet parlamentare.
“Jam shumë i lumtur se edhe takimet ku janë bërë këto deklarata kanë qenë shumë të mira. LSI është një forcë politike që hyn në zgjedhje për të fituar, ka pasur gjithnjë ambicie, jashtë kësaj pune të palodhur s’do ishte këtu, do ishte një parti humbëse.
Natyrshëm LSI do vazhdojë të punojë fort që t’i arrijë këto standarde sa më të larta, sigurisht që janë votuesit që e thonë fjalën, do presim çfarë do vendosin ata pastaj do marrim vendimin se çfarë do kërkojmë”.
