Presidenti i SHBA-së Biden përcolli vetë urimet më të mira me rastin e 100 vjetorit të vendosjes së marrëdhënieve diplomatike Shqipëri – SHBA
“Të gjithë popullit të Shqipërisë, i dërgoj urime të më përzemërta të miqësisë jetëgjatë me SHBA-në ndërsa festojmë 100 vjetorin e vendosjes së marrëdhënieve diplomatike mes vendeve tona. Kur SHBA e mbrojtën Shqipërinë pas Luftës së Parë Botërore u krijua një miqësi e përhershme mes popujve tanë, një dashuri e përbashkët për lirinë dhe për vlerat e demokracisë, të cilat nuk u thyen kurrë. Sot, Shqipëria dhe SHBA janë aleate në NATO dhe partnere që punojnë së bashku për mbrojtjen e lirisë dhe demokracisë në Europë dhe në mbarë botën, duke përfshirë punën tonë në Këshillin e Sigurimit të OKB-së. Shqipëria ka bërë gjithashtu një kontribut kritik në mbështetjen e nevojave humanitare dhe të sigurisë për popullin ukrainas teksa mbrojnë veten e tyre kundër luftës brutale të Rusisë. Dua gjithashtu që të falenderoj popullin e Shqipërisë për mikpritjen tuaj në strehimin e mijëra afganëve gjatë vitit të kaluar. SHBA do të vazhdojë të qëndrojë me Shqipërinë teksa punoni për të forcuar institucionet demokratike, luftën kundër korrupsionit, sundimin e ligjit dhe plotësoni udhëtimin për t’iu bashkuar Bashkimit Europian. Uroj që dy kombet të vazhdojnë të ndërtojnë mbi gjithçka që kemi arritur së bashku dhe të ofrojmë një të ardhme më të fuqishme, shpresëdhënëse për fëmijët tanë”, thuhej në mesazhin e kreut të Shtëpisë së Bardhë, të transmetuar me video gjatë aktivitetit të sotëm në Tiranë lidhur me 100-vjetorin e marrëdhënieve diplomatike Shqipëri – SHBA.
Një mesazh nga ish-Presidenti Bush u lexua po ashtu gjatë aktivitetit: “Unë dhe Laura ju dërgojmë urimet më të ngrohta. Ky gurë kilometrik është një dëshmi e miqësisë mes vendeve tona, Nuk e harrojmë kurrë mikpritjen dhe kohën e bukur që kaluam në vendin tuaj, Jam i lumtur të shoh marrëdhëniet mes Shqipërisë dhe SHBA-së. Shqipëria është një forcë e së mirës në botë dhe SHBA-ja është krenare që ju quan aleate”.
Ambasadorja amerikane Yuri Kim, në fjalën e saj u shpreh se SHBA nuk është lëkundur kurrë nga besimi në një Shqipëri të pavarur dhe sovrane.
Një fjalim e mbajti dhe kryeministri Edi Rama e ministrja e Jashtme Olta Xhaçka.
Pjesë e aktivitetit, përveç socialistëve ishin dhe individë nga opozita si Ilir Meta, Monika Kryemadhi apo Fatmir Mediu. Prezent ishte dhe Enkelejd Alibeaj, si dhe Presidenti Bajram Begaj, i cili po ashtu mbajti një fjalim.
