Në futboll ndodh shpesh që të vijnë ndarje me mirëkuptimin e të gjitha palëve, por kur njëra nga të dyja palët duhet të bëjë një lëshim, atëherë lindin probleme.
Madje edhe lojtarët që kanë shkruar historinë e klubit trajtohen me njëfarë gjakftohtësie kur lojtari në fjalë largohet duke përplasur derën.
A mjafton një zgjedhje e njëanshme për të fshirë vite besnikëri dhe paraqitje të jashtëzakonshme? Duke parë historinë e Robert Lewandowski, ndoshta po.
Polaku sapo është larguar nga Bayern Munich për te Barcelona për 50 milionë euro dhe në Allianz Arena duket se tashmë e kanë harruar. Në të vërtetë, ata shpjegojnë se gjërat do të shkojnë shumë më mirë, edhe në fushë, pa të.
Të gjithë sytë te Lewandowski
Deklaratat e Julian Nagelsmann dhe Oliver Kahn të raportuara nga Bild janë nga ato që fansat i mbajnë shënim për t’i përdorur nëse gjërat nuk shkojnë ashtu siç mendohej.
Në fund të fundit, Lewandowski ishte thelbësor për fatin e Bayern-it dhe duket absurde që lamtumira e tij të shihet në një këndvështrim pozitiv.
Por tekniku ka idenë e tij për këtë. “Nuk mendoj se do të jetë shumë e lehtë tani për skuadrat kundërshtare. Përpara trajnerët fokusoheshin se si ta ndalonin Lewandowskin, e di nga përvoja.
“Por tani që do të ketë shumë lojtarë që do të shkëmbejnë pozicione, do të jetë më e ndërlikuar”. Por a do të mjaftojnë Gnabry, Mane, Sane, Coman, Musiala dhe Muller?
Si do të luajë Bayern?
Ndoshta jo, por merkato nuk ndihmon. “Opsionet për një sulmues janë të kufizuara dhe kushtojnë shumë”. Por lamtumira e polakut do të amortizohet. “Ne do të ndryshojmë mënyrën e lojës.
“Kur humbet një sulmues që ka shënuar 40 gola për vite, është një pjesë e rëndësishme që largohet, por do të jetë një sfidë për të gjithë që të shkëlqejnë pas epokës së Lewandowskit”.
Kahn gjithashtu e sheh në mënyrë të ngjashme. “Nëse do të isha trajneri kundërshtar, do të mendoja gjatë gjithë kohës se si mund të luante Bayern tani e tutje. Ne kemi kaq shumë opsione sulmuese dhe me Mane kemi marrë një lojtar të klasit botëror që mund të luajë në role të ndryshme”.
Dhe Lewa duket i harruar që tani. Gjithmonë me kusht që sulmuesit e shumtë në dispozicion të Nagelsmann të jenë në gjendje të mbushin boshllëkun. Në fund të fundit, historia e CR7 në Madrid mëson…
