Trajneri i Bayern Munich, Vincent Kompany, ka reaguar pas fitores spektakolare ndaj Real Madrid, duke theksuar karakterin dhe reagimin e skuadrës së tij si çelësin e suksesit.
Bayerni siguroi kualifikimin me rezultat të përgjithshëm 6-4, pasi triumfoi 4-3 në një ndeshje dramatike, ku u detyrua të rikthehej tri herë nga disavantazhi. Pavarësisht fillimit të vrullshëm të madrilenëve, që shënuan që në sekondat e para përmes Arda Güler, skuadra gjermane nuk u dorëzua në asnjë moment.
“Kishte vetëm një shpjegim të thjeshtë: ne nuk humbëm. Sa herë që ata shënonin, ne reagonim menjëherë,” u shpreh Kompany, duke vlerësuar mentalitetin luftarak të ekipit të tij.
Ai pranoi cilësinë e lartë të kundërshtarit, duke përmendur edhe golat e tjerë të realizuar nga Güler dhe Kylian Mbappé, por theksoi se Bayerni ishte i përgatitur për çdo situatë.
“Nuk na befasuan. E dimë çfarë cilësie kanë në çdo pozicion. Por atmosfera këtu ishte diçka e veçantë dhe na dha shtysë,” shtoi ai.
Në gjysmëfinale, Bayerni do të përballet me Paris Saint-Germain, por Kompany nuk do të jetë në stol për ndeshjen e parë për shkak të pezullimit, një vendim që ai e kritikoi hapur.
“Nuk jam i kënaqur me kartonin e verdhë. Pezullimi prej tre ndeshjesh është shumë i rëndë,” deklaroi trajneri belg.
Sa i përket përballjes me PSG-në, Kompany u tregua i kujdesshëm në vlerësim, duke i cilësuar të dy ekipet si ndër më të fortët aktualisht.
“Nuk mund të thuhet se kush është më i fortë. Janë dy nga ekipet më të mëdha dhe do të na duhet maksimumi për t’i mposhtur,” përfundoi ai.
