Aleanca për Mbrojtjen e Butrintit ka dalë me një reagim nga sheshi para Kuvendit ku po proteston prej më shumë se 12 orë, pas rrëzimit me 72 vota të dekretit të Presidentit të Republikës Ilir Meta, i cili e ktheu mbrapsh koncesionin e miratuar nga qeveria e Edi Ramës për t’ja kaluar Parkun Natyror të Butrintit Fondacionit Shqiptaro-Amerikan të Zhvillimit për një periudhë 10 vjeçare.
Përfaqësuesi i aleancës, Aulon Kalaja e quajti datën 14 korrik 2022, si datën që do të mbahet mend si një nga datat më të turpshme të historisë së Shqipërisë që varrosi Butrintin.
Kalaja hodhi akuza në drejtim të qeverisë, se po punon kundër interesave të qytetarëve shqiptarë dhe se kjo betejë nuk ka pëfunduar pasi ky ligj do të shkojë në Gjykatën Kushtetuese.
“Jemi në orën e 12 të protestës. Siç e morët vesh me 72 vota u rrëzua dekreti i presidentit. Butrinti u dha me koncesion. Data 14 korrik 2022 do të mbahet mend si një nga datat më të turpshme të historisë së Shqipërisë që varrosi Butrintin bashkë me datën 23 maj.
Pra janë dy votimet e këtij parlamenti që ka humbur lidhjen me realitetin dhe po punon kundër interesave të qytetarëve shqiptarë. Nuk prisnim ndonjë surprizë por jetojmë në një kohë që nuk mund ta ndryshojmë realitetin por kjo nuk na pengon të protestojmë ndaj padrejtësive dhe prandaj qëndruam 12 orë bashkë me këto djem dhe vajza nga Durrësi pasi këta e kuptojnë shumë qartë rrezikun që i kanoset Durrësit pas Butrinti nga kjo qeveri pushtuese duke marrë çdo nga kala shqiptare.
Prandaj jemi sot këtu për ti thënë që kjo betejë nuk ka përfunduar por kjo betejë do të shkojë në Gjykatën Kushtetuese dhe ne do të fitojmë”, tha Kalaja.
