Rastet me Covid në Shqipëri janë rritur disa herë, ndërsa përgjatë 1 muaji janë infektuar me Covid rreth 11 mijë persona.
Rritje pësuan dhe të shtruarit në spitale e humbjet e jetës, por jo me ritmin e të infektuarve të rinj.
Megjithatë autoritetet shëndetësore parashikojnë një situatë më pesimiste në vjeshtë.
“Ashtu sikurse është alertuar edhe nga Organizata Botërore e Shëndetësisë, vjeshta mund të vijë me një valë të re të covid19 dhe varianteve të reja të Omicron. Ndaj ne duhet të bëhemi gati që t’i përballojmë të gjitha ato emergjenca që mund të vijnë në të ardhmen, duke qenë të përgatitur dhe duke ndërtuar kapacitetet dhe duke i fuqizuar ato”, tha Ogerta Manastirliu, ministre e Shëndetësisë.
Spitali Infektiv në Qendrën Spitalore “Nënë Tereza” në Tiranë pritet të përfundojë rikonstruksionin në fund të korrikut dhe brenda gushtit të presë pacientët e parë.
Infektivi do të ketë 118 shtretër.
Për t’iu përgjigjur emergjencave ministrja Manastriliu tha se mund të kthehet në gjysmë terapi intensive.
“Bërja funksional i këtij spitali do të fillojë në muajin gusht, ku edhe do të kemi një hapje të këtij shërbimi të ri. Ashtu sikurse tashmë kjo strukturë është e projektuar, do të kemi më shumë se 60% të dhomave me ajër me presion negativ. Kjo ndihmon shumë përsa i përket trajtimit të sëmundjeve infektive. Reanimacioni rrit kapacitetet duke i dyfishuar ato. Ndërkohë që gati të gjitha dhomat ofrojnë të gjitha panelet e gazrave mjekësore duke e kthyer në një moment të caktuar nëse do të na duhet dhe një spital pra, gjysmë terapie intensive”, tha ajo.
