Ish-ministri i Drejtësisë, Ylli Manjani shprehet se protesta e sotme nuk është e jashtëzakonshme, por thjesht fillimi i një zakoni të mirë demokratik. Ndaj ajo nuk është e fundit, por fillimi i protestave të tjera, shton ai.
“Qytetaria reagon, proteston, qoftë edhe me ftesë të partive politike. Partitë për këtë punë janë. Edhe kur protestonte populli me thirrjen e Ramës kështu ishte. Sot nuk ka zgjidhje magjike, por është magji të reagimit demokratik. Populli që s’proteston, sundohet, nuk qeveriset. Sot nuk bie Rama, por bie tangërllëku bajat i tij që mendon të vdesë i qelbur në pushtet. Sot nuk vendoset kush është më i mirë ndër të këqinjtë, por fillohet ndarja nga e keqja me të cilën bashkjetojmë nën shprehjen e Mehdi Malkajt ‘çmë duhet mua’”, shkruan më tej ish-ministri në një postim në FB.
“Protesta është jeta e demokracisë. Nesër do jetë një dite e re, një protestë e re. Por protestën e sotme mos e lër për nesër”, e mbyll ai reagimin.
