Elisa Spiropali, ministrja e Shtetit për Marrëdhëniet me Parlamentin, duket se po e zbaton me shumë devotshmëri detyrën e caktuar për të replikuar me kreun e PD, Sali Berisha sa herë ky i fundit flet në Kuvend.
Edhe pse në mbi 99 % të fjalimeve që mban në Kuvend, Berisha as e përmend dhe as e përfill Spiropalin, ministrja e Ramës në çdo seancë ripërsërit tekstin e mësuar përmendësh.
Pas fjalës së Berishës, i cili denoncoi tenderat që jepen me 99.9 % të vlerës së fondit limit, Spiropali u drejtua ndaj deputetëve të tjerë të PD duke u thënë se këta të fundit nuk shqetësoheshin për qytetarët dhe se nuk po e merrnin dot veten që pas rrëzimit nga pushteti në vitin 2013.
“Si do e stolistë Dule protestën e Berishës? Meqë ju jeni një njohës shumë i mirë se shumëkush nga këta që janë këtu. Nëse ka një stoli të cilës i është rënë në qafë në këtë kuvend ajo është fjala e gjuhës shqipe.
Ju duken sikur të gjitha gjërat që i bënin vetë po i bëjmë ne. Nuk ka krim më të madh se ta kthesh sallën e kuvendit të Shqipërisë në një arenë të tillë të shpërdorimit më kriminal të gjuhës shqipe.
Po ç’ti bëjmë ne që jeni kapur pas flokëve të Saliut si i mbyturi që mbyt. Sa më shumë që kapeni pas flokëve të tij aq më shumë tregoni se nuk keni hallin e qytetarëve. Ju doni të nxisni turmat që të shpëtoni Saliun.
Nuk e zhbëni dot kontrastin e madh mes jush dhe nesh të cilët që në ditën e parë jemi përballur me krizat e rindërtimit. E keni marrë një goditje të fortë në 2013 dhe mesa duket ju kokën më nuk po e ngrini për këtë gjë sepse pushtetin e shihni shumë të largët”, u shpreh Spiropali.
Edhe në seancën e sotme duket se ministrja e Ramës e përmbushi me sukses detyrën e saj, pasi e vetmja kompetencë që duket se i është lënë, është pikërisht replika me Berishën, sa herë që ai flet në Kuvend.
