Policia e Tiranës ka njoftuar se ka arrestuar një person dhe ka shpallur në kërkim katër të tjerë në lidhje me incidentin e ndodhur më 4 korrik, ku disa të rinj thyen xhamat e Komisariatit nr. 3.
Krahas personit të arrestuar dhe katër të shpallurve në kërkim, blutë e Tiranës bëjnë me dije se janë proceduar penalisht edhe shtatë persona të tjerë për përfshirje në ngjarje.
Sipas njoftimit zyrtar, të dyshuarit akuzohen për një sërë veprash penale, mes të cilave “Thirrje publike për veprime të dhunshme”, “Shkatërrimi i pronës”, “Goditja për shkak të detyrës”, “Kundërshtimi i punonjësit të Policisë” dhe “Mosbindja ndaj urdhrit të ligjshëm të punonjësit të Policisë”.
Gjithashtu, ndaj tyre janë ngritur akuza për “Prishjen e rendit dhe të qetësisë publike”, “Organizimin dhe pjesëmarrjen në grumbullime dhe manifestime të paligjshme” si dhe “Pengimin e qarkullimit të mjeteve të transportit”.
