Shtetet e Bashkuara janë kualifikuar në 16 skuadrat më të mira të Kupës së Botës 2026, pasi mposhtën 2-0 Bosnje dhe Hercegovinën në një ndeshje të dominuar nga polemikat për kartonin e kuq të Folarin Balogun.
Skuadra e Mauricio Pochettino-s kaloi në avantazh në fundin e pjesës së parë, kur Balogun shfrytëzoi një top të mbetur në zonë dhe dërgoi topin në rrjetë, pasi një gol i mëparshëm i tij ishte anuluar për pozicion jashtë loje.
Bosnja provoi të reagonte në pjesën e dytë, ndërsa humbi edhe Edin Džeko-n për shkak të një dëmtimi.
Momenti vendimtar erdhi në minutën e 64-t, kur Balogun u ndëshkua me karton të kuq pas ndërhyrjes ndaj Tarik Muharemović. Vendimi u mor pas ndërhyrjes së VAR-it dhe shkaktoi protesta të forta nga lojtarët amerikanë, stafi teknik dhe trajneri Mauricio Pochettino, të cilët e konsideruan të tepruar përplasjen mes dy futbollistëve.
Me një lojtar më shumë, Bosnja shtoi presionin në kërkim të barazimit, por nuk arriti të gjejë rrugën e rrjetës përballë mbrojtjes amerikane.
Në minutat e fundit, SHBA vulosi kualifikimin. Sergiño Dest fitoi një goditje dënimi pranë zonës dhe Malik Tillman realizoi një supergol me një goditje perfekte mbi murin mbrojtës, duke mposhtur portierin boshnjak për rezultatin përfundimtar 2-0.
“Duhej të luftonim deri në fund. Kartoni i kuq nuk ishte pjesë e planit, por kjo tregon karakterin e kësaj skuadre”, deklaroi pas ndeshjes Christian Pulisic.
Trajneri Mauricio Pochettino vlerësoi shpirtin e ekipit.
“Jam krenar për të gjithë lojtarët. Ata treguan karakter dhe sakrificë në një moment shumë të vështirë të ndeshjes”, tha tekniku argjentinas.
Falë këtij suksesi, Shtetet e Bashkuara sigurojnë një vend në fazën e 1/8-ave, ku do të përballen me Belgjikën, në një duel që rikthen kujtimet e eliminimit të amerikanëve nga “Djajtë e Kuq” në Kupën e Botës 2014.
