Ish-ambasadori Agim Nesho deklaroi se korrupsioni në Shqipëri është kthyer në institucion dhe se qeveria e Edi Ramës po përballet me një krizë të thellë politike, ndërsa qytetarët nuk kanë më frikë.
I ftuar në ‘Çim Peka LIVE’, Nesho tha se protesta e 4 korrikut duhet të jetë sa më masive, pasi numri i qytetarëve në shesh është faktori që e vë në vështirësi kryeministrin.
Ai akuzoi Ramën se po përdor dhunën për të frenuar protestat dhe se policia po vihet në shërbim të regjimit, ndërsa i bëri një thirrje të drejtpërdrejtë SPAK-ut të veprojë ndaj aferave të denoncuara, duke e cilësuar këtë moment si një “provë historike” për institucionin e drejtësisë.
Në fund, Nesho u bëri thirrje qytetarëve që më 4 korrik të mblidhen para Kryeministrisë dhe të zhvillojnë një qëndresë paqësore, pa përplasje fizike, duke qëndruar aty si formë presioni ndaj qeverisë.
Nesho: Protestat duhet të vazhdojnë, sepse numri e rrëzon Ramën. Prandaj ai është në një moment kur kërkon të përdorë dhunën për të ulur nivelin e pjesëmarrjes së popullit në protesta dhe demonstrime. Kjo tregon se ndodhet në një lloj krize.
Vetë komuniteti ndërkombëtar sot po thotë se ai do të largohet në fund të korrikut ose në shtator; kjo është çështje ditësh. Njerëzve u ka ikur frika dhe duhet ta dinë se ai tani është një tigër prej letre. I kanë mbetur vetëm disa, si Bido apo ndonjë sharlatan tjetër, të cilët dalin në konferenca për shtyp, projektojnë forcë dhe mbrojnë policinë.
Në asnjë vend demokratik të botës policia nuk i shërben një regjimi, aq më tepër një autokrati që ka marrë formën e një diktatori. Policia duhet të distancohet.
Dhe e fundit që doja të thosha është se sot është dita e SPAK-ut. SPAK-u ose duhet të kryejë detyrën përpara Kushtetutës, ligjit dhe qytetarëve shqiptarë, ose më pas do të japë llogari përpara historisë. Janë toleruar shumë gjëra. Ata njerëz që deri tani kanë besuar, po e shohin konkretisht se ky korrupsion tashmë është i dukshëm dhe i provuar. “Albanian File” e tregonte këtë më mirë se çdo gjë tjetër, por SPAK-u nuk po vepron.
Nuk ka më kohë. Populli është në rrugë. Ideja e Ramës se ka 800 e ca mandate janë përralla me mbret. Nëse populli del në rrugë, ti nuk ke më asnjë mandat. Prandaj unë bëj thirrje që më 4 korrik të dalin sa më shumë njerëz dhe kjo të jetë një kërkesë e vazhdueshme. Ndoshta edhe të qëndrojnë aty. Ata janë njerëz trima, të rinj dhe guximtarë, dhe duhet të bëjnë një qëndresë të fundit. Nuk ka nevojë për përplasje fizike; mjafton të qëndrojnë. Ta rrethojnë Kryeministrinë dhe të qëndrojnë aty.
