Pas 25 ditësh protestash të pandërprera kundër qeverisë dhe ndërsa tubimet janë shtrirë jo vetëm në Tiranë, por edhe në disa qytete dhe shtete ku jetojnë shqiptarë, Presidenti Bajram Begaj ka gjetur më në fund kohë për të reaguar.
Teksa prej ditësh ndodhej në një vizitë zyrtare në Kirgistan, ku në rrjetet sociale qarkulloi edhe një video ku ai luante lojën tradicionale “pesë gurë” me banorë vendas, kreu i shtetit ka thyer heshtjen për protestat që kanë hyrë tashmë në javën e katërt.
Në një aktivitet për 100-vjetorin e Prefekturës së Tiranës, Begaj deklaroi se qytetarët po shprehin shqetësimet e tyre në mënyrë paqësore dhe se e drejta për t’u shprehur është një vlerë e mbrojtur nga Kushtetuta.
“Ky aktivitet zhvillohet në një moment kur qytetarë po shprehin publikisht shqetësimet dhe pritshmëritë e tyre në mënyrë paqësore.
Në respekt të pozicionit kushtetues, neutralitetit kushtetues, mund të theksoj se e drejta për t’u shprehur dhe për të marrë pjesë në jetën publike është një vlerë e mbrojtur nga Kushtetuta, e cila duhet të ushtrohet në pajtim me Kushtetutën dhe ligjet e vendit.
Konsolidimi i demokracisë dhe zhvillimi i qëndrueshëm i vendit mbështeten në angazhimin e përbashkët të qytetarëve dhe institucioneve për të vepruar në përputhje me Kushtetutën dhe interesin kombëtar dhe atë publik.
Korniza kushtetuese, së bashku me rregullat e shtetit ligjor dhe demokracisë përbëjnë garancinë kryesore për funksionimin e drejtë të shoqërisë. Si President i Republikës, mbetem i përkushtuar në mbrojtje të Kushtetutës, të të drejtave dhe lirive themelore të qytetarëve, si dhe në nxitjen e një klime bashkëpunimi dhe dialogu që i shërben interesit kombëtar dhe publik, të ardhmes evropiane dhe përkatësisë dhe vlerave Euroatlantike të vendit”,– tha Begaj.
Deklarata vjen pasi Presidenti kishte shmangur çdo koment publik për protestat e zhvilluara për 25 ditë radhazi para Kryeministrisë, ku kërkohet dorëheqja e kryeministrit Edi Rama.
Ndërsa protestuesit prisnin një qëndrim nga institucioni më i lartë i shtetit, Begaj dukej i angazhuar me axhendën e tij.
Vetëm pas rikthimit nga Kirgistani, Presidenti vendosi të kujtojë se qytetarët kanë të drejtë të protestojnë, duke theksuar se kjo duhet të bëhet në përputhje me Kushtetutën dhe ligjet e vendit.
