Analisti Mentor Kikia, duke komentuar protestat kundër Edi Ramës, u shpreh se qëllimi kryesor i revoltës qytetare duhet të jetë ndryshimi i qeverisjes.
Në një intervistë për News24, ai theksoi se qeveria tranzitore më pas ka për detyrë që të garantojë zgjedhje të parakohshme me kushte të barabarta për të gjitha forcat politike.
Sipas tij, qeveria tranzitore duhet të ndërmarrë një reformë të thellë elektorale, e cila të çlirojë votën nga ndikimi i pushtetit, të ndalojë përdorimin e administratës publike në fushata zgjedhore dhe të sigurojë transparencë financiare për partitë politike.
Ai theksoi se vetëm pas këtyre ndryshimeve, vota e lirë e qytetarëve duhet të përcaktojë se kush do të drejtojë vendin.
“Kjo protestë duhet të zgjidhë vetëm një çështje, të ndryshohet qeverisja dhe qeveria tranzitore të garantojë një proces zgjedhor të parakohshëm me rregulla loje të barabarta.
Po ashtu të hartojë një ligj zgjedhor që të çlirojë votën nga ndikimi i partisë që ka pushtetin, të eliminojë futjen e të gjithë arsenalit të administratës publike në procesin zgjedhor, të garantojë transparencë financiare të partive, duke pamundësuar futjen e parave të krimit për të furnizuar makineritë elektorale.
Po ashtu të hartohet reforma e thellë elektorale dhe atëherë vota e lirë përcakton kush do të jetë kryeministër. Nëse kjo qeveri nuk na pëlqen e heqim me zgjedhje të parakohshme”, deklaroi Kikia.
