Debati i hapur nga deklaratat e kryeministrit Edi Rama mbi ndikimin e “algoritmit” në rrjetet sociale ka sjellë reagime edhe nga specialistët e teknologjisë.
I ftuar në News24, inxhinieri kibernetik Erion Demiri shpjegoi se termi “algoritëm” po përdoret në mënyrë të pasaktë në diskutimin publik, duke krijuar idenë se ekziston një mekanizëm i fshehtë që favorizon përmbajtje të caktuara.
Sipas tij, algoritmet e platformave digjitale nuk bëjnë zgjedhje politike, por funksionojnë mbi bazën e interesit dhe aktivitetit të përdoruesve. Sa më shumë reagime, komente dhe shpërndarje të marrë një përmbajtje, aq më e madhe bëhet mundësia që ajo të shfaqet te një audiencë më e gjerë.
Demiri kujtoi se prej vitesh forcat politike kanë investuar në praninë e tyre online, duke përdorur ekipe dhe mbështetës që ndërvepronin masivisht me postimet e tyre për të rritur shtrirjen në rrjet.
Megjithatë, ai vlerëson se situata ka ndryshuar me nisjen e protestave qytetare, ku përmbajtja nuk po qarkullon falë strukturave të organizuara, por përmes pjesëmarrjes së drejtpërdrejtë të qytetarëve.
Sipas ekspertit, videot, fotografitë dhe mesazhet e shpërndara nga protestuesit kanë krijuar një volum të madh ndërveprimesh, çka ka bërë që platformat t’i promovojnë ato në mënyrë automatike.
Ai theksoi se kjo ka ndryshuar mënyrën se si qarkullon informacioni në hapësirën publike, duke i dhënë më shumë peshë përmbajtjes së krijuar nga qytetarët sesa mesazheve të prodhuara nga strukturat tradicionale politike.
Në analizën e tij, shqetësimi i vërtetë nuk lidhet me teknologjinë, por me humbjen e kontrollit që politika ka pasur për vite me radhë mbi komunikimin publik.
“Kur mijëra qytetarë publikojnë dhe shpërndajnë të njëjtin mesazh, ai fiton shtrirje të madhe pa pasur nevojë për ndërhyrje artificiale. Kjo është arsyeja pse përmbajtjet e protestave po qarkullojnë kaq shumë”, u shpreh Demiri.
Sipas tij, fenomeni që po shihet në rrjet nuk është rezultat i një algoritmi që favorizon një palë, por pasojë e angazhimit të gjerë dhe spontan të qytetarëve në debatin publik.
