Tregtia e jashtme njohu rritje të lehtë në muajin maj, me eksportet që kapën vlerën e 33 mld lekëve. Nga ana tjetër, importet kushtuan 81 mld lekë, duke thelluar deficitin.
Eksportet e mallrave arritën në 33 miliardë lekë gjatë muajit maj 2026, me një rritje 3% krahasuar me të njëjtën periudhë të vitit të kaluar. Ndërkohë, në raport me muajin prill, ato janë ulur 6%.
Nga ana tjetër, importet vijuan trajektoren rritëse, duke arritur në 81 miliardë lekë, ose 4% më shumë se në maj 2025. Si rezultat, deficiti tregtar u zgjerua në 48 miliardë lekë, me rritje vjetore 5%.
Sipas treguesve të INSTAT, rritja e eksporteve është mbështetur kryesisht nga sektori i ushqimeve, pijeve dhe duhanit, i cili dha kontributin më të madh pozitiv. Po ashtu, ndikim të rëndësishëm kanë pasur materialet e ndërtimit dhe metalet, si dhe grupi i makinerive, pajisjeve dhe pjesëve të këmbimit.
Në kahun tjetër, sektori që vazhdon të vuajë më shumë mbetet industria fason. Rënia e porosive nga tregjet europiane dhe vështirësitë konkurruese vijojnë të reflektohen në performancën e këtij sektori.
Në rritjen e importeve, ndikimin më të fortë e kanë pasur mineralet, lëndët djegëse dhe energjia elektrike, të cilat kanë kontribuar me 3.2 pikë përqindje. Rritje kanë shënuar gjithashtu importet e ushqimeve, pijeve dhe duhanit, si dhe produktet kimike dhe plastike.
Në aspektin gjeografik, Kosova dhe Greqia rezultojnë partnerët që kanë kontribuar më shumë në rritjen e eksporteve shqiptare gjatë muajit maj.
Ndërkohë, në anën e importeve, Italia dhe Kina kryesojnë rritjen e mallrave që hyjnë në Shqipëri./Euronews
