Edi Rama zgjedh të injorojë Shqipërinë e 1001 halleve, ndërsa e cilëson vendin si një histori suksesi për sa i përket rrugës drejt Bashkimit Europian.
Duke folur në Podcastin e tij të përjavshëm, sipas Ramës, vendi po ecën me “reforma, vizion dhe durim” drejt unionit, pavarësht korrupsionit dhe krimit në çdo qelizë të institucioneve qeveritare.
Rama gjithashtu nuk harroi të sulmojë edhe opozitën duke i akuzuar për “fushatë negative ndaj Shqipërisë në arenën ndërkombëtare”.
“Përshëndetje nga Tokio. Prej ku para nisjes në Shqipëri po regjistroj këto shënime për këtë moment për Shqipërinë, sa i takon shkallës së respektit, për dinjitetin që qëndrojmë në dinjitetin e shteteve. Në Tokio dhe Kore gjetëm mbështetje për bashkëpunim mes këtyre vendeve aziatike. Ai ballafaqim në BE mori kohën e vetë.
Ndërkohë që molotovarët u lëshuan në një ofensivë të dëshpëruar. U lëshuan rrugëve, për ta djegur Shqipërinë në sytë e botës. Gëzonin si fëmijë kur fotot e kazanëve me flakë apo molotovëve që hidheshin nëpër Tiranë, bënin xhirot e botës.
Mblidh dhe hidh jargë urrejtje politike pasqyrë më pasqyrë. Ata lanë kokrrën e namit si asnjë opozitë të vendeve që sot janë pjesë e BE. Thanë se rruga europiane ishte e bllokuar, thanë se qeveria ishte e ndëshkuar dhe se ishim të izoluar. Por u gënjyen.
Shqipëria europiane që po ndërtojmë, është një histori suksesi, një histori që nuk shkruhet me britma, nuk bëhet me shpifje apo me molotovë, por me vizion, me punë, me durim të madh dhe me përkushtim hap pas hapi, reformë pas reforme.– tha Rama.
