Kreu i Forumit të Dialogut Politik, Ermal Hasimja, ka reaguar lidhur me debatet e fundit për pragun zgjedhor, duke i bërë thirrje “Partisë Mundësia” dhe “Lëvizjes Bashkë” të paraqesin propozimet e tyre konkrete për këtë çështje.
Në deklaratën e tij, Hasimja thekson se shqetësimet e ngritura nga Agron Shehaj dhe Arlind Qori lidhen kryesisht me pragun prej 4%, ndërsa sipas tij, këto parti nuk kanë kundërshtuar thelbin e paketës së propozuar nga opozita për kodin e ri zgjedhor.
Hasimja fton sërish Shehajn dhe Qorin të paraqesin propozimet e tyre konkrete në lidhje me çështjen, ndërsa shton se nëse partitë opozitare kanë objektiv të përbashkët largimin e qeverisë, atëherë bashkëpunimi mbetet një hap themelor për arritjen e këtij qëllimi.
“Para pak ditësh z. Agron Shehaj (“ Partia Mundësia”) shprehu shqetësimin e tij për çështjen e pragut prej 4% të parashikuar në qëndrimin e unifikuar të opozitës për kodin e ri zgjedhor. Edhe z. Qori (“Lëvizja Bashkë”) ka patur rezervat e tij. Nga deklarimet e tyre publike, këto dy parti nuk kanë shfaqur kundërshtime me thelbin e propozimit: proporcional kombëtar (Shqipëria një zonë zgjedhore), koalicione parazgjedhore dhe lista të hapura.
Pas konsultimit me shumicën e partive të tjera të tryezës dhe me dëshirën e mirë për të ndërtuar bashkëpunim gjithëpërfshirës të opozitës edhe për çështjen e pragut, Forumi i Dialogut Politik fton “Partinë Mundësia” dhe “Lëvizja Bashkë” të paraqesin propozimet e tyre konkrete për pragun zgjedhor.
Nëse partitë opzitare kanë objektiv të përbashkët largimin e qeverisë, bashkëpunimi është hap themelor në arritjen e këtij qëllimi të përbashkët.
Forumi konsideron se çështja e një kodi të ri zgjedhor që garanton fushë loje të barabartë për të gjithë nuk është vetëm çështje e partive, por e të gjithë qytetarëve shqiptarë. Prandaj, ftojmë “Partinë Mundësia” dhe “Lëvizja Bashkë” të angazhohen në këtë çështje madhore për interesat e qytetarëve”,– thuhet në reagim.
