Policia ka zbardhur detaje në lidhje me operacionin antidrogë të zhvilluar mëngjesin e kësaj të shtune në Elbasan.
Sipas njoftimit zyrtar, në kuadër të operacionit janë arrestuar 16 persona, ndërsa 8 të tjerë janë shpallur në kërkim.
Nga të dhënat bëhet me dije se nga 16 urdhrat e ndalimit të ekzekutuar, 8 prej tyre u realizuan gjatë operacionit të zhvilluar mëngjesin e sotëm, ndërsa 8 të tjerë ishin ekzekutuar gjatë periudhës njëvjeçare hetimore. Ndërkohë, janë shpallur në kërkim 8 shtetastë tjerë, të cilët nuk u gjetën në banesat e tyre gjatë ndërhyrjes së policisë.
Po ashtu, gjatë operacionit janë ekzekutuar 27 vendime gjykate për kontrolle në banesa dhe ambiente të ndryshme në zonat e Elbasan, Librazhd dhe Prrenjas, ku dyshohet se ushtronin aktivitetin e tyre personat e përfshirë në trafikimin dhe shpërndarjen e lëndëve narkotike.
“Gjatë operacionit të zhvilluar mëngjesin e sotëm, u bë e mundur ekzekutimi i 8 urdhrave të ndalimit për shtetasit I. Sh., 38 vjeç; R. Z., 52 vjeç; G. Ç., 23 vjeç; A. B., 49 vjeç; N. S., 39 vjeç; L. F., 33 vjeç; J. I., 31 vjeç dhe M. Ç., 32 vjeç. Gjithashtu, gjatë operacionit u bë arrestimi në flagrancë i shtetasit R. H., 39 vjeç, si dhe u kap shtetasi në kërkim P. Q., 54 vjeç, i shpallur në kërkim nga Gjykata e Shkallës së Parë e Juridiksionit të Përgjithshëm Durrës për veprën penale “Menaxhimi i mbetjeve”, kryer në bashkëpunim. Gjithashtu, u ekzekutuan 27 vendime të Gjykatës për kontrolle banesash dhe ambientesh të ndryshme”, njoftoi policia vendore.
Në kuadër të këtij aksioni janë sekuestruar 9 kilogramë lëndë e dyshuar narkotike kanabis, një pjesë e ndarë në doza gati për shitje, rreth 100 gram kokainë, gjithashtu e përgatitur për treg, 5 peshore elektronike, 7 automjete dhe 17 aparate celularë.
Policia bën me dije se hetimet vijojnë për dokumentimin e plotë ligjor të kësaj veprimtarie kriminale, si dhe për lokalizimin dhe kapjen e personave të shpallur në kërkim, ndërsa materialet procedurale i janë referuar Prokurorisë për veprime të mëtejshme.
