Sali Berisha, teksa lexoi njoftimin e Prokurorisë së Posaçme mbi sekuestrimin e pasurive të grupit të AKSHI-t, tha se aty mungonte Linda Rama, bashkëshortja e kryeministrit, që siç thekson lideri opozitar është numri 1 i grupit kriminal.
Në mbledhjen e Grupit Parlamentar të PD, Berisha tha se Linda Rama është denoncuar nga Gerond Meçe, se ajo përcaktonte fituesit e tenderave.
Po ashtu, sipas Berishës rrëmbimet e disa biznesmenëve janë bërë llogari të familjes Rama.
“Mungon numri 1, numri 1 i këtij grupi është Linda Rama, asnjë fjalë. Asnjë fjalë për Armand Frangun. Pengjet janë për familjen Rama, në mënyrë që askush të mos i përzihet Edi Ramës në kopshtin privat. Kam lexuar para shqiptarëve dokumentin, ku Geron Meçe denonconte Linda Ramën si përcaktuese të fitimit të tenderave në AKSHI dhe dosja nuk u zhduk sic donte Rama, mbeti aty, por këtu nuk është bërë asnjë veprim. Del se është gjobitur edhe një shtetase shqiptaro gjermane, 2 mln euro i kanë marrë asaj. Harrova t’u them, Mirlinda e gjora, vetëm në një shishe ka marrë 200 mijë euro ryshfet”, tha ndër të tjera Berisha.
