Rasti i publikuar sot, më 20 prill, në emisionin “Stop”, në Tv Klan, lidhej me një qytetare, e quajtur Xhevahire, e cila denoncoi një rast të dyshuar mashtrimi lidhur me konkursin “X Talent Globe”, i organizuar nga “Kiki Model” me producent Kreshnik Husaj.
Sipas saj, vajza e saj u përfshi në këtë aktivitet, pas një rekomandimi nga mësuesja në një qendër kulturore.
Afati për këtë pagesë ishte nga 4 marsi 2025 deri më 3 janar 2026, por shuma nuk është dhënë. Më tej, vajza u shpall një nga fitueset e një çmimi prej 50 mijë eurosh, i ndarë mes katër pjesëmarrësve.
Prindërit deklarojnë, se kanë paguar përqindje për këtë çmim, në vlerën 5%, duke arritur një shumë totale 3 mijë e 150 euro, përfshirë edhe një transfertë prej 650 eurosh.
Pavarësisht këtyre pagesave, familja nuk ka marrë as pagesën e premtuar për angazhimin dhe as pjesën takuese të çmimit.
Kreshnik Husaj ka shtyrë vazhdimisht afatet, duke justifikuar vonesat me procedura dhe pritje fondesh nga donatorë apo bashkëpunime mes Shqipërisë dhe Kosovës.
Aktualisht, është premtuar një pagesë e pjesshme deri më 1 qershor 2026 dhe pjesa tjetër deri në fund të vitit, por familja shprehet skeptike pas më shumë se një viti pritjeje.
Qytetarja:
-Në X Talent Globe, me producent Kreshnik Husaj, nga produksioni Kiki Models.
-Ne na u dha një shumë prej 10 mijë euro për angazhimin në këtë aktivitet. Jo nuk i kemi marrë këto. Edhe kjo ka qenë nga data 4.3.2025-3.01.2026. Brenda këtij afati duhej të merrej shuma.
-Pastaj, kur është mbajt finalja, me 31.05, janë shpërnda disa çmime. Ky çmimi është me shumën 50 mijë euro, po janë 4 emra aty. Kur është firmos kjo deklarata, e kemi pas me 15.06, me na kalu shuma në bankë.
-Ne vetëm një person kemi njohur nga ky aktivitet, vetëm me këtë Kreshnik Husaj kemi pas të bëjme ne. Dhe ky na ka thënë, që do të kalojnë, po ngaqë është një bashkëpunim Kosovë-Shqipëri, ka fut sikur është Ministria e Kulturës e Shqipërisë, që i vonon këto, çdo muaj, dalin me 15 të këtij muaji, vinte muaji, jo po do dalin muajin tjetër. Se kështu janë ca probleme, nuk na ka shpjegu një gja të qartë.
Kreshnik Hysaj, në telefonatë:
-Kreshnik Husaj: Alo! Mirë faleminderit!
-Ne kemi nje marrëveshje noteriale me familjen. Eshtë shumë e vërtetë, që afatet kanë kaluar dhe jemi në pritje të këtij procesi, derisa mjetet të vijnë nga donatori te ne. Domenika jemi në një situatë, që jemi në pritje dhe vetë dhe nuk të jap dot përgjigje fikse as ty.
-Asnjëherë! Ore asiherë, asiherë ti nuk më bën mua të them diçka, kur nuk ka ndodh.
/Emisioni STOP
