Tre vite pas ngjarjes së rëndë të ndodhur në qytetin e Fierit, ku një 41-vjeçar u qëllua me armë zjarri për vdekje, është arrestuar edhe i dyshuari i dytë, i shpallur në kërkim.
Ai është 38-vjeçari me inicialet A.G., banues, ndërsa më parë ishte arrestuar edhe vëllai i tij si bashkëautor.
Policia bën me dije se i ndaluari sot (20 prill), dyshohet se në bashkëpunim me vëllanë e tij, kanë qëlluar me armë zjarri në vitin 2023 në drejtim të një automjeti që drejtohej nga 41-vjeçari.
“Ekzekutohet nga Sektori për Hetimin e Krimeve të Rënda urdhri i ndalimit për një 38-vjeçar, i akuzuar për vrasje. Specialistët e Sektorit për Hetimin e Krimeve të Rënda në DVP Fier ekzekutuan urdhrin e Prokurorisë Fier për ndalimin e shtetasit A. G., 38 vjeç, banues në Fier”, tha policia.
Sqarohet se Gjykata e Fierit ka caktuar ndaj këtij shtetasi masën e sigurisë “arrest me burg”, për veprat penale “vrasje me paramendim” dhe “mbajtja pa leje dhe prodhimi i armëve, armëve shpërthyese dhe i municionit”.
“38-vjeçari dyshohet se, në bashkëpunim me vëllain e tij, shtetasin K. G. (aktualisht në paraburgim në ambientet e IEVP Fier), më datë 07.12.2023, në lagjen “16 Prilli”, Fier, pas një konflikti për motive të dobëta, kanë qëlluar me armë zjarri në drejtim të një automjeti që drejtohej nga shtetasi E. J., 41 vjeç. Si pasojë e të shtënave, 41-vjeçari ka humbur jetën në vendngjarje”, bëri me dije policia ve ndore për dinamikën e krimit.
Hetimet po i kryen Prokuroria e Fierit, të cilës iu kaluan edhe materialet proceduriale të aksionit.
