Një zjarr i përmasave të mëdha ka rënë ditën e sotme në venddepozitimin e mbetjeve në landfillin e Bushatit, duke shkaktuar një situatë problematike në zonë.
Institucioni i Prefektit të Qarkut Shkodër bën të ditur se zjarri vijon të jetë aktiv, ndërsa flakët po favorizohen nga era, teksa shton se situata po menaxhohet dhe mbahet nën kontroll nga strukturat përgjegjëse në terren.
Në ndërhyrje janë angazhuar rreth 20 efektivë të shërbimit zjarrfikës me tre automjete, në bashkëpunim me punonjësit e landfillit dhe Policinë Bashkiake. Operacioni është mbështetur edhe nga njësi të ardhura nga bashkitë Shkodër, Lezhë, Tiranë dhe Kamëz, duke siguruar një koordinim të gjerë ndërinstitucional.
Paralelisht, po përdoren mjete të rënda si ekskavatorë dhe kamionë për izolimin e vatrave të zjarrit dhe kufizimin e përhapjes së tij. Furnizimi me ujë vijon pa ndërprerje përmes autobotëve të vendosur në zonë.
Sipas autoriteteve, zjarri ka përfshirë mbetje urbane dhe, në këtë fazë, nuk paraqet rrezik për banesat përreth.
