Kryeministri Edi Rama pritet të thirret si dëshmitar në seancat e radhës që do të mbahet për dosjen “Partizani” ndaj kreut të PD, Sali Berisha dhe të pandehurve të tjerë.
Sipas raportimeve në media, Rama do të thirret si dëshmitar në cilësinë e ish-kreut të Bashkisë së Tiranës.
Ndërkohë krahas tij do të thirret si dëshmitar edhe Taulant Balla, i cili njëkohësisht është edhe kallëzues në këtë çështje.
Thirrja e dëshmitarëve në seancë është bërë me kërkesë të vetë Sali Berishës. Nga ana tjetër raportohet se nuk është pranuar kërkesa që të pyetet oficeri i policisë gjyqësorë, Besmir Karanxha, pasi sipas gjykatës nuk ka relevancë pyetja e tij, sepse nuk arrihet ndonjë qëllim me marrjen e dëshmisë së tij.
Ndërkohë, po ashtu raportohet se është kërkuar të thirrn gjithashtu si dëshmitarë biznesmeni Paro Laçi, si dhe shtetasit Albert Xhani dhe Isa Tare.
Seanca gjyqësore është caktuar të mbahet më dat 30 prill ora 12:00, ndërsa seanca pasardhëse është caktuar më 11 maj në orën 10:00.
Ndërkohë mësohet se dëshmitari Taulant Balla do të jetë i pari që do të dëshmojë në seancën e ardhshme. Janë 7 emra që do të flasin përveç Ballës në seancën e datës 30 prill.
Kujtojmë që dosja “Partizani” me 333 fashikuj u dorëzua pasditen e 18 tetorit të viti 2024 në gjykatë nga Prokuroria e Posaçme. Pritet që gjatë seancës ish-kryeministri Berisha të kërkojë revokim të masës së sigurimit.
Sali Berisha akuzohet në këtë dosje për korrupsion pasiv. Jamarbër Malltezi e Fatmir Bektashi akuzohen për korrupsion e pastrim parash ndërsa dy të pandehurit e tjerë vetëm për pastrim parash.
Kryetari i Partisë Demokratike dhe dhëndri i tij janë nën masën e sigurisë “detyrim paraqitje” dhe përgjatë hetimit kanë mohuar akuzat. Ndërsa biznesmeni Fatmir Bektashi është hetuar nën masën detyrim paraqitje. Xhimi Begeja e Andia Pustina janë hetuar në gjendje të lirë gjatë kësaj kohe.
