Krimineli Ratko Mladić ka pësuar një goditje në tru dhe ndodhet në gjendje të rëndë, tha i biri i tij, Darko Mladić.
Ai i tha agjencisë Srna se kjo ndodhi të premten, më 10 prill, dhe se pret që nga shërbimi shëndetësor i gjykatës në Hagë të marrë dokumentacionin për të parë saktësisht çfarë ka ndodhur.
Sipas tij, Mladić është në gjendje shumë të rëndë dhe nuk mund të ulet më as në karrocë, ndërsa komunikon me vështirësi.
Siç raporton Tanjug, gjatë qëndrimit në paraburgim në Holandë ai ka pësuar disa probleme serioze shëndetësore, përfshirë dy goditje në tru dhe një atak në zemër.
Avokatët e tij kanë pohuar disa herë se nuk merr kujdesin mjekësor të duhur dhe se problemet e tij shëndetësore nënvlerësohen. Që nga viti 2024 ai ndodhet në spitalin e paraburgimit në Hagë.
Ndryshe, Mladić në qershor 2012 u dënua me burgim të përjetshëm për 10 nga 11 pikat e aktakuzës. Këto pika janë: për gjenocidin në Srebrenicë, për krime kundër njerëzimit, për shfarosje dhe krime kundër popullsisë civile, për vrasje dhe krime kundër popullsisë civile, për vrasje dhe shkelje të ligjeve e zakoneve të luftës, për deportime dhe krime kundër popullsisë civile, për zhvendosje çnjerëzore dhe krime kundër popullsisë civile, për terrorizim dhe shkelje të ligjeve e zakoneve të luftës, për sulme të paligjshme ndaj civilëve dhe shkelje të ligjeve e zakoneve të luftës, si dhe për marrjen peng të personelit të OKB-së dhe shkelje të ligjeve e zakoneve të luftës.
