Shtetet e Bashkuara kanë nisur një bllokadë detare ndaj Iranit, duke synuar të rrisin presionin ekonomik ndaj Teheranit, pas dështimit të bisedimeve të fundit për paqe në Pakistan. Sipas raportimit të CNN, masa hyri në fuqi në orën 10:00 sipas kohës lindore.
Korpusi i Gardës Revolucionare Islamike (IRGC) ka deklaruar se do të reagojë ndaj bllokadës, ndërsa zyrtarët iranianë kanë paralajmëruar për pasoja në ekonominë globale, përfshirë rritjen e kostove për konsumatorët amerikanë.
Hasan Alhasan, studiues i lartë në Institutin Ndërkombëtar për Studime Strategjike në Bahrein, tha për CNN se Irani ka disa alternativa për të zbutur efektet e bllokadës, por efektiviteti i tyre mbetet i pasigurt. Sipas tij, Teherani mund të përpiqet të rrisë eksportet e energjisë përmes rrugëve që shmangin Ngushticën e Hormuzit.
Këto alternativa përfshijnë përdorimin e tubacioneve drejt Irakut, Turqisë dhe Armenisë për eksportin e gazit, si dhe shfrytëzimin e terminalit të naftës në Neka, në Detin Kaspik. Gjithashtu, Irani mund të rrisë kontrabandën e karburantit përmes kufirit tokësor me Pakistanin ose të përdorë metoda të përziera eksporti, duke maskuar origjinën e naftës.
Në planin ushtarak, Alhasan thekson se Irani mund të synojë anije amerikane ose të nxisë aleatët e tij, si Huthitët në Jemen, për të ndërhyrë në Ngushticën Bab el-Mandeb, një tjetër pikë strategjike për tregtinë globale.
Sipas CNN, bllokada e porteve iraniane përfaqëson një fazë të re të përshkallëzimit, ku SHBA-të po testojnë aftësinë e Iranit për të përballuar presionin në disa fronte njëkohësisht.
