Kryebashkiaku i arrestuar i Tiranës, Erion Veliaj i është drejtuar sërish Gjykatës Kushtetuese me kërkesën e shfuqizimit si të papajtueshëm me Kushtetutën, të vendimit të GJKKO, më 9 shkurt, e cila kaloi për gjykim dosjen penale në ngarkim të tij.
Sipas njoftimit të ndarë për mediat, Veliaj pretendon se atij dhe avokatëve u është mohuar koha reale për të analizuar një dosje me dhjetëra faqe.
Po ashtu ai ngre shqetësime edhe për mënyrën e zhvillimi të gjykimit duke pretenduar se janë cënuar pavarësia dhe paanshmëria e gjykatës si dhe prezumimi i pafajsisë së Veliajt.
Ndërkohë kjo lëvizje e Veliajt vjen një ditë pasi Kolegjet e Bashkuara të Gjykatës së Lartë, u mblodhën pas shumë vitesh, për të shqyrtuar ndryshimin e praktikës gjyqësore për vendosjen e masës së arrestit në burg.
Sipas raportimeve, kjo lëvizje e gjykatës me në krye Sokol Sadushin ka për qëllim të lirojë nga paraburgimi pikërisht zyrtarët e politikës.
Deklarata e plotë e mbrojtjes së Veliajt
Në vijim të praktikës sonë për të informuar opinionin publik mbi çdo veprim ligjor të ndërmarrë nga mbrojtja e z. Veliaj, ju bëjmë me dije se sot kemi depozituar në Gjykatën Kushtetuese kërkesën për shfuqizimin e vendimit nr. 29, datë 09.02.2026, të Gjykatës së Posaçme të Shkallës së Parë për Korrupsionin dhe Krimin e Organizuar, si dhe për pavlefshmërinë e të gjitha veprimeve të kryera mbi bazën e këtij vendimi.
Kërkesa jonë përfshin gjithashtu shpalljen si antikushtetuese të dy dispozitave ligjore që kanë kontribuar drejtpërdrejt në cenimin e të drejtave kushtetuese të z. Veliaj, si dhe të çdo qytetari të Republikës së Shqipërisë, që ndodhet në të njëjtat kushte.
Thelbi është i qartë:
Ky proces është zhvilluar në shkelje të rëndë të të drejtave themelore. Z. Veliaj dhe mbrojtjes së tij i është mohuar koha reale për të analizuar një dosje me dhjetëra mijëra faqe, duke e reduktuar mbrojtjen në një formalitet; Parimi i barazisë së armëve është cenuar, pasi prokuroria ka vepruar në avantazh të plotë procedural; Gjykimi është zhvilluar në kushte që cenojnë pavarësinë dhe paanshmërinë e gjykatës; Z. Veliaj është trajtuar në mënyrë të tillë që cenon prezumimin e pafajësisë dhe dinjitetin njerëzor, përfshirë mbajtjen në kushte izolimi gjatë seancave ku ai duhet të mbrohet i lirë.
Në këto kushte, vendimi për dërgimin e çështjes në gjyq është marrë mbi një proces të kompromentuar në themel, duke prodhuar një proces antikushtetues dhe për rrjedhojë, të pavlefshëm, i cili nuk mund të prodhojë pasoja juridike të vlefshme.
Për këto arsye, i kemi kërkuar Gjykatës Kushtetuese:
të shfuqizojë vendimin e seancës paraprake;
të shpallë të pavlefshme veprimet e kryera mbi bazën e tij;
të shpallë si të papajtueshëm me Kushtetutën nenin 14 të ligjit nr. 95/2016;
të shpallë si të papajtueshëm me Kushtetutën nenin 332/gj të Kodit të Procedurës Penale.
Kjo nuk është thjesht një çështje individuale. Është një sfidë për rivendosjen e rendit kushtetues dhe lidhet drejtpërdrejt me mënyrën se si funksionon drejtësia në këtë vend. Ne do të përdorim çdo mjet ligjor për të garantuar që Kushtetuta dhe standardet evropiane të mos mbeten deklarative në letër, por të zbatohen realisht, ashtu siç sovrani – populli shqiptar – ka shprehur vullnetin e tij përmes miratimit të Kushtetutës.
