Një rast i tentativës për kontrabandë është zbuluar në Pikëkalimin Kufitar të Merdarës, ku autoritetet doganore kanë konfiskuar një sasi të konsiderueshme mallrash të padeklaruara.
Sipas njoftimit, një autobus i linjës ndërkombëtare është ndaluar për kontroll, ndërsa drejtuesi i mjetit ka deklaruar fillimisht se nuk kishte asgjë për të raportuar. Megjithatë, automjeti është përzgjedhur për kontroll të detajuar në vijën e dytë.
Gjatë inspektimit të imtësishëm, zyrtarët kanë zbuluar mall të fshehur në pjesën e motorit dhe në hapësirën e tualetit të autobusit. Bëhet fjalë për tri pako me cigare elektronike, në një sasi prej 500 copësh, me vlerë të përafërt rreth 10 mijë euro.
Si pasojë, Dogana e Kosovës ka sekuestruar përkohësisht mallin deri në përfundimin e procedurave administrative.
