Dosja për vrasjen e biznesmenit shqiptar Fatmir Ara ka marrë një zhvillim të ri, pasi Gjykata e Apelit në Torino ka ndryshuar vendimin për një nga personat e përfshirë në ngjarje.
Andrea Fagnoni, i cili më herët ishte shpallur i pafajshëm në shkallën e parë, është dënuar tashmë me 6 vite, 2 muaj e 20 ditë burg. Sipas gjykatës, ai ka ndihmuar autorin duke e shoqëruar me makinë drejt vendit ku ndodhi krimi. Gjithashtu, ndaj tij është vendosur edhe një periudhë mbikëqyrjeje pas përfundimit të dënimit.
Ndërkohë, për autorin e vrasjes, Davide Osella Ghena, mbetet në fuqi dënimi me burgim të përjetshëm. Po ashtu, Apeli ka lënë të pandryshuar edhe vendimin për pafajësinë e motrës së tij, e cila akuzohej për sigurimin e armës së krimit.
Ngjarja ndodhi më 2 shtator 2022 në zonën e San Carlo Canavese, ku Ara u qëllua për vdekje me armë gjahu. Sipas hetimeve, motivi lidhej me konflikte financiare, pasi viktima po punonte në rikonstruksionin e një prone në pronësi të autorit dhe partneres së tij.
Trupi i pajetë i tij u gjet dy ditë më vonë, pasi ishte denoncuar i zhdukur nga familjarët.
