Kryedemokrati, Sali Berisha iu bëri thirrje qytetarëve që të marrin pjesë në protestën kombëtare të radhës, që do të mbahet më 17 prill, duke theksuar se duhet që të marrin në dorë fatin e tyre dhe të vendit.
Në konferencën e sotme për mediat, Berisha përsëriti akuzat se Edi Rama, se nëpërmjet mediave që kontrollon, po tenton që të zhdukë dosjen e Belinda Ballukut, pasi sipas tij, pas kësaj dosjeje qëndron vetë shefi i qeverisë.
Sipas Berishës, qytetarët nuk duhet të lejojnë që integrimi të bllokohet për shkak të qeverisë, ndërsa përsëriti thirrjen për pjesëmarrje në protestë.
“Mediat e vendit, të kontrolluara nga qeveria, nga mëngjesi deri në darkë, marrin ushqimin toksik nga zyrat e qeverisë dhe propagandën toksikë për të fshehur këto të vërteta dhe mashtruar qytetarët shqiptarë. Tmerrësisht e dhimbshme. Unë paralajmërova para jush disa ditë më parë se po bëhet gjithçka për të varrosur çështjen balluku, de facto çështja Rama. Por asnjë njeri nuk duhet të harrojë se ajo çështje është jetike për të ardhmen e shqiptarëve, e integrimit të tyre për në BE. Çdo kthim mbrapa në aparencë është çështja Balluku, por në fakt është dosja Rama që qëndron në çdo faqe të çështjes Balluku. Ndaj edhe jam këtu për të qëndruar për interesin më të mirë të shqiptarëve edhe evropian të tyre. Iu bëj thirrje shqiptarëve të marrim në dorë fatin tonë e të Shqipërisë, të mos lejojmë që aktet e vjedhjes të tmerrshme të taksave e pasurive publike nga anëtarët e organizatës kriminale të kryesuar nga Rama të na mbyllin dyert e të ardhmes evropiane dhe të vazhdojmë të shpërbëhemi si komb. Edhe njëherë BE foli. Nuk mbyllet asnjë kapitull pa votimin e IBAR. Dhe IBAR nuk votohet. Bllokimi i IBAR do të thotë bllokimi i mbylljes së çdo kapitulli. Ftoj shqiptarët me 17 prill të flasin për veten e tyre.”, tha Berisha.
