Një 28-vjeçar është arrestuar në Kavajë, pasi më herët gjatë ditës së sotme kanosi me armë dy persona në një lokal në lagjen nr.2 dhe goditi me qytën e pistoletës pronarin e lokalit.
I riu u kap pas disa orësh kërkime nga ana e policisë, teksa kur u largua me shpejtësi përplasi me automjet dhe dy automjete të tjera.
Rreth orës 9:40 të mëngjesit të sotëm, 28-vjeçari Murat Curri hyri në një kafe të Kavajës në lagjen nr.2 dhe kanosi me armë dy klientë të lokalit, si dhe goditi me qytën e pistoletës pronarin e kësaj bar-kafeje, S.V., 64 vjeç duke i shkaktuar dëmtime të lehta.
Më pas, i riu u largua nga vendngjarja me shpejtësi me automjetin e tij tip Range Rover. Rrugës duke ikur me shpejtësi të lartë, ai dëmtoi dy automjete, si dhe u përplas me një trafikndarëse.
Pistoletën me të cilën kishte kanosur dy persona dhe goditur pronarin e lokalit, e kishte hedhur në një kanal anës rrugës, e cila u gjet dhe sekuestrua nga policia.
Pas disa orë kërkimesh Murat Curri u lokalizua dhe u kap në një hotel te zona e Shkëmbit të Kavajës. Gjatë kontrollit në automjet iu gjet dhe krehëri me municion luftarak.
