Gjykata e Foggia-s në Itali ka lënë në paraburgim 14 persona të arrestuar gjatë operacionit të javës së kaluar, ku u parandalua një grabitje e armatosur ndaj një furgoni të blinduar që transportonte rreth 8 milionë euro.
Vendimi u mor nga gjyqtari hetues i Modenës, Andrea Scarpa, pas marrjes në pyetje të të dyshuarve në burgun e Modenës.
Mes të arrestuarve janë edhe tre shtetas shqiptarë: Emiliano Smakaj, Alban Zeneli dhe Jurgen Xhixha.
Ata akuzohen si pjesë e grupit kriminal dhe u lanë në qeli si të dyshuar për tentativë grabitjeje të rënduar me metoda mafioze.
Grupi i përbërë nga persona nga Foggia, Cerignola dhe Shqipëria dyshohet se ka lidhje me klanet mafioze të zonës.
Hetuesit kanë deklaruar se rrethanat rënduese lidhen me përdorimin e metodave tipike mafioze. Dokumentet e hetimit tashmë janë transferuar tek Drejtoria Antimafia e Bolonjës (DDA).
Arrestimet u kryen më 18 mars në Vignola, pranë Modenës, ku policia i kapi në flagrancë të dyshuarit, të cilët po përgatiteshin të sulmonin automjetin e blinduar të kompanisë së sigurisë “Battistolli”.
Furgoni ishte nisur nga Paderno Dugnano në periferi të Milanos dhe duhej të mbërrinte në Bolonjë.
Gjatë kontrolleve, policia sekuestroi armë kallashnikovë, municione, makina me fuqi të lartë, pajisje gjurmuese, katër kova me gozhdë për të bllokuar furgonin e blinduar, si dhe materiale të tjera ndihmëse për realizimin e grabitjes.
