Gjykata Provinciale në Spanjë ka dënuar me 25 vite burg shtetasin shqiptar Florian Rama, i shpallur fajtor për vrasjen e të riut Soufian Mraha në vitin 2019.
Sipas vendimit të dhënë në Spanjë, gjykata e konsideroi të provuar se i pandehuri kreu krimin me paramendim, pas një konflikti të çastit jashtë një lokali në jug të provincës së Pontevedrës.
Ngjarja ndodhi në orët e para të mëngjesit, kur viktima ndodhej me miqtë në tarracën e një bari. Pas një debati të shkurtër, Rama e sulmoi fizikisht dhe më pas e goditi disa herë me thikë në zona jetike, duke i shkaktuar plagë fatale. I riu arriti të largohej për disa metra, por u rrëzua dhe humbi jetën si pasojë e hemorragjisë së rëndë.
Pas krimit, autori u arratis nga vendi i ngjarjes dhe për një kohë të gjatë i shpëtoi drejtësisë. Hetimet e Guardia Civil bënë të mundur identifikimin e tij përmes provave gjenetike dhe analizës së materialeve të mbledhura në vendin e ngjarjes.
I dënuari u arrestua në Mbretëria e Bashkuar dhe më pas u ekstradua drejt Spanjës, ku u përball me drejtësinë.
Përveç dënimit me burg, gjykata ka vendosur që pas përfundimit të vuajtjes së dënimit, ai të dëbohet nga territori spanjoll dhe t’i ndalohet rikthimi për një periudhë 10-vjeçare. Gjithashtu, është urdhëruar dëmshpërblim prej 300 mijë eurosh për familjen e viktimës.
