Nga Boldnews.al
Në fund të dhjetorit 2025, kryeministri Edi Rama shpërndau në publik një mashtrim të rëndomtë, sa i përket gjendjes financiare të (ish) Drejtoreshës së Agjencisë Kombëtare të Shoqërisë së Informacionit (AKSHI), Mirlinda Karçanaj, e cila është në “arrest shtëpie”, nën dyshimet se është pjesë e një grupi kriminal të përfshirë në “shkeljen e barazisë në tendera”.
Në takimin e fundvitit me gazetarët, Rama vlerësoi maksimalisht ekipin institucional të AKSHI-t, duke kritikuar të gjithë ata që besojnë se Karçanaj është përfshirë në manipulimin e tenderave me vlera miliona euro.
“Në krye të skuadrës së AKSHI-t është një grua që ka respektin e padiskutueshëm. Linda Karçajan, që ka një masë sigurie, me një shtëpi me qira ku jeton, pasi më parë jetonte në një shtëpi të postkomunizmit në banesën e prindërve të tij”, deklaroi Rama në atë konferencë.
Deklaratat e kryeministrit janë tërësisht të pavërteta, bazuar në dokumentat e depozituara nga vetë Mirlinda Karçanaj pranë Inspektoratit të Lartë të Deklarimit dhe Kontrollit të Pasurive e Konfliktit të Interesave (ILDKPKI).
Në deklaratat e pasurisë, të siguruara nga “Boldnews.al”, nëpërmjet një kërkese për informacion, rezulton se Mirlinda Karçanaj dhe bashkëshorti i saj, Artan Babaramo, me funksion drejtor drejtorie në administratën qendrore të Tatimeve, është pronare e 5 apartamenteve, një ullishteje, si edhe disa llogarive bankare.
Mbrojtja me element mashtrues që Rama u bën në publik bashkëpunëtorëve të tij të kapur në shkelje ligjore është një sjellje që ai e ka dëshmuar që në fillimet e qeverisjes së tij.
Ai ironizoi këdo që e konsideronte ish-kryebashkiakun socialist të Kavajës, Elvis Roshi, si “përdhunues” dhe “të përfshirë në trafik droge”, derisa Prokuroria e Përgjithshme i konfirmoi këto të dhëna në vitin 2016.
Në vitin 2017, Rama hodhi poshtë të gjithë akuzat ndaj ish-ministrit të tij kampion të Brendshëm, Saimir Tahiri, për përfshirje në trafik droge, ndërkohë që ky i fundit u dënua në vitin 2022.
Kryeministri ka realizuar mbrojtje publike me element që besohet se janë të rremë edhe për ish-ministrin e Shëndetësisë, Ilir Beqja, kryebashkiakun e arrestuar të Tiranës, Erion Veliaj e deri tek (ish) zv.kryeministrja, Belinda Balluku.
Por, duke u rikthyer tek drejtoresha, tashmë e larguar, e AKSHI-t, Mirlinda Karçanaj, deklaratat e Ramës se ajo jeton “një shtëpi me qira ku jeton, pasi më parë jetonte në një shtëpi të postkomunizmit në banesën e prindërve të tij”, janë tërësisht të pavërteta, bazuar në dokumentat zyrtare.
Karçanaj me 5 shtëpi
Mirlinda Karçanaj është një bashkëpunëtore e hershme e kryeministrit Edi Rama. Në maj të vitit 2007, ajo emërohet Drejtoreshë e Teknologjisë së Informacionit në Bashkinë e Tiranës, kur institucioni drejtohej nga Rama.
Karçanaj largohet nga Bashkia në vitin 2011, kur Rama humbi zgjedhjet lokale të vitit 2011. Sapo Rama mori pushtetin në vitin 2013, Mirlinda Karçanaj ishte një ndër emërimet e para të tij. Ajo u emërua Drejtoreshë e Përgjithshme e Agjencisë Kombëtare të Shoqërisë së Informacionit (AKSHI) në 7 tetor 2013, post që e mbajti për më shumë se 12 vjet, deri sa dha dorëheqjen, në shkurt 2026.
Në deklaratën fillestare të pasurisë, të dorëzuar në vitin 2007, Mirlinda Karçanaj deklaron se jeton në një apartament me sipërfaqe 94 metra katrorë, i ndërtuar në periudhën e komunizimit dhe i privatizuar në vitin 1994 me vlerë 20 mijë lekë të reja. Ajo thotë se zotëron 25 përqind të këtij apartamenti, në bashkëpronësi me familjen e saj të origjinës.
Në vitin 2016, kur kishte mbushur tre vjet në krye të AKSHI-it, pasuria e paluajtshme e Mirlinda Karçanaj merr një hov të rëndësishëm.
Së pari, ajo deklaron se ka kryer rivlerësimin e apartamentit që ka në bashkëpronësi me prindërit. Vlera e apartamentit të periudhës së komunizmit vlerësohet në shumën 13.4 milionë lekë të reja.
Katërfishohet vlera e apartamentit brenda vitit
Më tej, Karçanaj deklaron se ka blerë një apartament me sipërfaqe 136 metra katrorë, për shumën 65 mijë euro. Ky apartament është në bashkëpronësi me bashkëshortin e saj, Artan Babaramo, i cili në atë kohë mbante funksionin e Përgjegjësit të Sektorit në Drejtorinë e Përgjithshme të Tatimeve.
Sipas vetëdeklarimit të Karçanaj, burimi i krijimit të apartamentit është mbyllja e dy llogarive bankare të bashkëshortëve, konkretisht 34 mijë euro në emër të zonjës dhe 31 mijë euro në emër të Babaramo.
Për këtë apartament ka një zhvillim interesant. Vetëm një vit pas blerjes, e konkretisht në 2017, Mirlinda Karçanaj i bën rivlerësimin.
Vlera e tij kapërcen në 24.5 milionë lekë të reja ose rreth 4 herë më shumë, një lëvizje që nuk duket shumë normale në tregun e pasurive të paluajtshme.
Shtëpi në plazh
Viti 2016 duket se ka qenë viti i investimeve të rëndësishme në familjen e drejtoreshës së AKSHI-it.
Çifti Karçanaj-Babaramo blejnë edhe një apartament në zonën turistike të Qerretit, në Kavajë. Shtëpia në plazh ka sipërfaqe 60 metra katrorë dhe është blerë për shumën 17.300 euro.
Për burimin financiar, Karçanaj deklaron se ka mbyllur një depozitë bankare në shumën 1.5 milionë lekë të reja, ka përdorur një gjendje cash në shumën 750 mijë lekë të reja, si edhe ka përdorur rreth 1.5 milionë lekë, të cilat janë siguruar nga pagat që kishin marrë bashkëshortët për 5 muajt e parë të vitit 2016.
Apartamente trashëgimi
Në vitin 2022, pasuritë e paluajtshme të familjes së Mirlinda Karçanaj pësojnë rritje, kësaj radhe falë trashëgimisë.
Drejtoresha, tashmë e shkarkuar e AKSHI-t, deklaron në formularin e pasurisë së atij viti se është bërë pronare e një apartamenti me sipërfaqe 75 metra katrorë. Vlera e transaksionit është zero lekë, pasi ajo e ka përfituar këtë aset si trashëgimi.
Gjithashtu, Mirlinda Karçanaj deklaron se në të njëjtin vit, pra në vitin 2022, është bërë pronare e një ullishteje, me sipërfaqe 1500 metra katrorë, gjithashtu falë trashëgimisë.
Ndërkohë, po në të njëjtën kohë, bashkëshorti i saj, Artan Babaramo, i cili tashmë ishte emëruar Drejtor Drejtorie në Tatime, deklaron se është bërë bashkëpronar në një apartament me sipërfaqe 58 metra katrorë.
Ai deklaron se këtë apartament e ka përfituar nga trashëgimia ligjore dhe pjesa takuese e tij është 10 përqind.
Të dhënat e formularëve të pasurisë tregojnë se Mirlinda Karçanaj ka në total 5 pasuri të paluajtshme apartamente dhe duket tërësisht e paqartë se përse kryeministri Edi Rama duhet të mashtronte publikisht, duke e konsideruar ish-shefen e AKSHI-it si një zonjë që “jetonte në shtëpi me qira”.
Ndoshta Mirlinda Karçanaj mund të jetojë vërtetë në shtëpi me qira, me shumë mundësi zgjedhja e saj. Por, kjo nuk e bën aspak të pastrehë, siç synoi ta prezantonte Rama para opinionit publik.
LEXO EDHE:
