Tre persona janë vënë në pranga nga Policia në Malësi të Madhe, në kuadër të një operacioni për goditjen e veprimtarive kriminale në fushën e vjedhjeve, armëmbajtjes pa leje dhe narkotikëve.
Sipas Policisë, u arrestua shtetasi M. Gj., 22 vjeç, banues në fshatin Zagorë, i cili u kap në flagrancë duke drejtuar një automjet tip “Volkswagen”, që dyshohet se e kishte vjedhur më 15 mars 2026 në fshatin Selcë. Nga hetimet rezulton se i riu dyshohet të jetë autor edhe i një tjetër vjedhjeje automjeti, të ndodhur më 3 gusht 2025, i cili u gjet i parkuar pranë banesës së tij.
Në vijim të kontrolleve, Policia arrestoi edhe shtetasit B. Gj., 39 vjeç, dhe E. Gj., 35 vjeç, po banues në fshatin Zagorë. Gjatë kontrollit në banesën e tyre, uniformat blu sekuestruan 2 armë gjahu (çifte), të cilat mbaheshin pa leje, si dhe rreth 1 kilogram e 150 gramë lëndë të dyshuar narkotike cannabis sativa.
Materialet procedurale i janë referuar Prokurorisë së Shkodrës për veprime të mëtejshme, ndërsa hetimet vijojnë për zbardhjen e plotë të veprimtarisë kriminale të të arrestuarve dhe për identifikimin e personave të tjerë të përfshirë.
