Dy persona humbën jetën dhe tetë të tjerë u plagosën në një aksident të rëndë rrugor që përfshiu katër automjete në Caravaggio, në Itali.
Ngjarja ndodhi rreth orës 12:30 të së dielës, më 15 mars, në rrugën provinciale SP185 Rivoltana, në segmentin drejt Mozzanica. Sipas hetimeve paraprake të Polizia Stradale, aksidenti dyshohet se u shkaktua gjatë një parakalimi të rrezikshëm.
Në timon të një Mercedes-Benz C180 ishte një 29-vjeçare me origjinë shqiptare, residente në Calvenzano, e cila dyshohet se tentoi të parakalonte një Volkswagen Sharan. Automjeti humbi kontrollin dhe u përplas me një Jeep, ndërsa më pas Mercedes-i kaloi në korsinë e kundërt dhe u përplas frontalish me një Citroen C5.
Si pasojë e përplasjes humbën jetën 38-vjeçari Fabio Saladdino dhe 73-vjeçarja Adele Villa, të cilët ndodheshin në Citroen. Tetë persona të tjerë mbetën të plagosur.
Mes të plagosurve është edhe drejtuesja shqiptare, e cila u transportua me helikopter në spitalin civil të Brescia. Ndërsa një nga të plagosurat u dërgua në spitalin Papa Giovanni XXIII Hospital në Bergamo.
Policia po heton rrethanat e aksidentit, ndërsa pamjet e kamerave të sigurisë së një restoranti pranë vendit të ngjarjes janë sekuestruar për hetime të mëtejshme.
