Rritja e fortë e çmimit të naftës në tregun shqiptar, që brenda një jave është rritur me rreth 25 lekë për litër, ka sjellë edhe reagimin e qeverisë.
Këtë të martë, konkretisht ministrat Delina Ibrahimaj, Petrit Malaj dhe Enea Karakaçi zhvilluan një takim me përfaqësues të kompanive që operojnë në tregun e karburanteve.
Sipas tyre, takimi u zhvillua për të diskutuar situatën e krijuar në tregun vendas dhe ndikimin që kanë luhatjet e çmimeve në tregjet ndërkombëtare.
Ministrja Ibrahimaj deklaroi përmes një postimi në rrjetet sociale se institucionet do të intensifikojnë kontrollin dhe analizën e çmimeve të karburanteve.
“Do të forcojmë monitorimin e përditshëm të tregut, duke analizuar vazhdimisht lidhjen mes çmimeve të bursës dhe çmimeve në tregun vendas, si dhe duke rritur transparencën me operatorët dhe publikun,” shkroi ministrja.
Ajo theksoi se do të monitorohet në mënyrë të vazhdueshme raporti mes çmimeve në bursat ndërkombëtare dhe atyre që aplikohen në tregun vendas, si dhe do të rritet transparenca me operatorët dhe publikun.
Po ashtu, ministrja bëri të ditur se do të krijohet një task-forcë e përbashkët me Tatimet dhe Doganat për të ndjekur nga afër marzhet e fitimit në të gjithë zinxhirin e tregtimit të karburanteve.
Megjithatë, kjo deklaratë duket qesharake, pasi qeveria ka tashmë akses në të dhëna të detajuara në kohë reale përmes sistemit të fiskalizimit, i cili regjistron gjithë zinxhirin e tregtimit, nga zhdoganimi deri te çmimi final i shitjes.
Këto të dhëna mund të përdoren për të identifikuar menjëherë devijimet nga marzhet normale dhe për të ndërhyrë në rast të fitimeve spekulative dhe nuk ka nevojë për task forcë e cila dukshëm është propaganda e radhës.
