Policia zvicerane ka vënë në pranga një shtetas shqiptar të dyshuar për përfshirje në trafik të kokainës, në zonën e Luganos.
Sipas raportimeve, operacioni është zhvilluar më 5 mars në kuadër të një hetimi të përbashkët me njësinë antidrogë të Policisë së Luganos.
I arrestuari është një 27-vjeçar me origjinë nga Shqipëria, i cili kishte udhëtuar në Zvicër si turist. Autoritetet dyshojnë se ai është i përfshirë në një rrjet më të gjerë të trafikimit të kokainës.
Gjatë kontrollit personal dhe në ambientet që ai përdorte, policia gjeti rreth 80 gramë kokainë, pajisje të përdorura për paketimin e drogës si dhe disa mijëra franga zvicerane në para të gatshme.
Ndaj të riut rëndojnë akuza për shkelje të rënduar të Ligjit Federal për Narkotikët dhe pritet të përballet me drejtësinë.
