Policia ka zbardhur dy raste të shkatërrimit të pronës me zjarr në Vlorë, ndërsa janë identifikuar dhe shpallur në kërkim dy autorët.
Sipas Policisë bëhet fjalë për shtetasit Francesko isufaj 27-vjeç dhe Izom Shehaj 34-vjeç.
Nga hetimet është zbuluar se 27-vjeçari ka rezultuar autor i djegies së dy automjeteve të parkuara në lagjen Pavarësia në Vlorë, ngjarje e ndodhur më 2 mars. Ai i ka vënë flakën një automjeti tip “Benz” në pronësi të shtetasit I.A., 63 vjeç dhe një “BMW” në pronësi të shtetasit E.R., 68 vjeç, duke shkaktuar dëme materiale.
Ndërsa 34 vjeçari dyshohet të jetë autor i ngjarjes së ndodhur më datë 3 mars, në orët e para të mëngjesit, në lagjen “Isa Boletini”. Ky shtetas dyshohet se ka djegur me zjarr një dyqan në pronësi të shtetasit P.R.
Materialet procedurale i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Vlorë për veprën penale “Shkatërrim i pronës me zjarr.
