Dy të vdekur dhe 39 të plagosur është bilanci deri më tani i aksidentit që ndodhi në Milano, ku një tramvaj doli nga shinat dhe më pas u përplas me një ndërtesë.
Mediat italiane raportojnë se aksidenti ka ndodhur për shkak se çelësi për të ndërruar shinat nuk është aktivizuar, duke rezultuar që tramvaji të vendosej në shinat e gabuara.
Sipas raportimeve, ka dyshime se drejtuesi i tramvajit ka humbur ndjenjat ose ndonjë problem tjetër shëndetësor, që e ka ndaluar këtë të fundit të shtypte butonin që vendoste tramin në shinat e duhura.
Zyra e prokurorit të Milanos njoftoi se kishte nisur një hetim për vrasje nga pakujdesia, ndërsa më shumë se tridhjetë zjarrfikës dhe anëtarë të Mbrojtjes Civile ishin aktivë në dhënien e ndihmës së shpejtë.
Njëkohësisht, sipas raportimeve momenti i daljes nga shinat ishte tronditës. Dëshmitarë nga vendngjarja kanë dëshmuar se xhamat e tramvajit në momentin e përplasjes janë thyer me një zhurmë shurdhuese, ndërsa tramvaji u përplas me forcë me ndërtesën.
