Kosova ende nuk ka një emër zyrtar për presidentin e ri, ndërsa mandatit të presidentes aktuale Vjosa Osmani i përfundon më 4 prill. Afati për zgjedhjen e kreut të ri të shtetit është 4 marsi, përndryshe vendi rrezikon të shkojë në zgjedhje të reja brenda 45 ditësh.
Kryeministri Albin Kurti deklaroi se as Lëvizja Vetëvendosje dhe as dy partitë e tjera të mëdha, Partia Demokratike e Kosovës (PDK) dhe Lidhja Demokratike e Kosovës (LDK), nuk kanë aktualisht një kandidat të shpallur.
Pas takimeve me kreun e PDK-së, Bedri Hamza, dhe atë të LDK-së, Lumir Abdixhiku, Kurti theksoi se po synohet një marrëveshje për të shmangur zgjedhjet.
“S’duhet që edhe gjysma e parë e vitit 2026 të na merret nga zgjedhjet. Do të përpiqemi maksimalisht t’i evitojmë ato”, u shpreh ai.
Për të propozuar një kandidat nevojiten të paktën 30 nënshkrime deputetësh. Për zgjedhjen e presidentit kërkohen 80 vota në dy raundet e para (dy të tretat e 120 deputetëve). Në raundin e tretë mjaftojnë 61 vota.
Kurti theksoi se Vetëvendosje ka 57 deputetë dhe, edhe në rastin më të mirë, mund të arrijë teorikisht në 66 vota, çka nuk mjafton për dy raundet e para. Ai shtoi se do të ishte e dëmshme të nxirrej një kandidat pa siguruar më parë mbështetjen e nevojshme.
Presidentja aktuale, Vjosa Osmani, ka shprehur ambicien për një mandat të dytë. I pyetur nëse do ta mbështesë, Kurti u përgjigj se aktualisht nuk janë mbledhur nënshkrime për asnjë kandidat, pasi pa një marrëveshje më të gjerë politike, procesi nuk mund të çojë në zgjedhje të suksesshme.
Nga ana tjetër, kreu i LDK-së, Lumir Abdixhiku, deklaroi se zgjidhja mund të vijë vetëm përmes konsensusit politik ose një marrëveshjeje mes partive, duke theksuar se ditët në vijim do të jenë vendimtare.
Nëse deri më 4 mars nuk arrihet të zgjidhet presidenti, Kosova do të përballet me zgjedhje të reja parlamentare.
