Meksika është përfshirë nga tensione dhe trazira pas raportimeve për vrasjen e një prej figurave më të kërkuara të botës së krimit, Nemesio Oseguera Cervantes, i njohur me nofkën “El Mencho”, lider i kartelit të fuqishëm Jalisco New Generation Cartel (CJNG).
Sipas mediave të huaja, ai u vra gjatë një operacioni ushtarak të zhvilluar në agim në qytetin Tapalpa, në shtetin e Jalisco. Operacioni i forcave të sigurisë ka shkaktuar reagim të menjëhershëm nga anëtarët e armatosur të organizatës, duke përshkallëzuar situatën në disa zona të vendit.
Pas lajmit për vdekjen e tij, grupe të armatosura ngritën qindra barrikada dhe bllokuan rrugë në të paktën 20 shtete. Raportohet për djegie automjetesh, përplasje të armatosura dhe tensione të përhapura në disa qytete.
Autoritetet kanë shtuar masat e sigurisë, ndërsa frika për një përshkallëzim të ri të dhunës është në rritje.
Në Guadalajara, qyteti i dytë më i madh i vendit dhe bastion tradicional i kartelit, shkollat dhe shumë biznese qëndruan të mbyllura për arsye sigurie. Rrugët u boshatisën, ndërsa banorët u izoluan në banesat e tyre nga frika e incidenteve.
Situatë e tensionuar u raportua edhe në aeroportin e qytetit, ku dhjetëra fluturime u anuluan ose u vonuan. Udhëtarë dhe turistë kërkuan mënyra alternative për t’u larguar nga zona.
Në destinacionet bregdetare si Puerto Vallarta, vizitorët u panë duke u larguar me nxitim, ndërsa autoritetet përpiqeshin të rikthenin rendin.
Presidentja e Meksikës, Claudia Sheinbaum, bëri thirrje për qetësi dhe siguroi se institucionet e sigurisë janë në terren për të garantuar stabilitetin.
Megjithatë, analistët paralajmërojnë se eliminimi i liderit të CJNG mund të hapë një fazë të re tensioni. Sipas tyre, ekziston rreziku i përplasjeve të brendshme për kontrollin e organizatës, por edhe i konfrontimeve me grupe rivale kriminale.
Vrasja e “El Mencho” mund të përfaqësojë një goditje të fortë ndaj strukturës së kartelit, por mbetet e paqartë nëse kjo do të sjellë dobësimin e tij apo do të nxisë një cikël të ri dhune me pasoja të paparashikueshme për sigurinë dhe stabilitetin social në Meksikë.
