Kryetari i Partisë Demokratike, Sali Berisha, në një komunikim me qytetarët ka komentuar nismën e PS-së për ndryshimet ligjore pasi Gjykata Kushtetuese la në fuqi vendimin e Gjykatës së Posaçme për pezullimin nga detyra të Belinda Ballukut.
Berisha u shpreh se mbrojtja që kryeministri Rama po i bën vartëses së tij, po mbyll dyert e Evropës për Shqipërinë.
“Mbrojtja qe po i bën Edi Rama, Lubi Ballukut, pra vetes së tij, ligji që po kalon, është një ligj që mbyll në mënyrë absolute dyert e Europës për Shqipërinë“, tha Berisha.
Kryedemokrati theksoi se edhe delegacioni i Parlamentit Europian që ishte pak ditë më parë në Shqipër, kërkonte pa diskutim të mos pengohet drejtësia dhe që Balluku të shkojë atje ku kërkon prokuroria.
“Tre ditë më parë ishte në Shqipëri delegacioni i Parlamentit Europian që erdhi me kërkesën e opozitës si mision faktmbledhës.
Ju e dëgjuat, kërkonin pa diskutim të mos pengohet drejtësia. Kërkonin që Balluku të shkojë atje ku kërkon prokuroria. Deklaruan se integrim nuk ka në qoftë se mbrohet korrupsioni”, tha ai.
