Situata në vendin e quajtur “Arrat e Gurrës”, në zonën e Dragostunjës, përgjatë aksit kombëtar Librazhd–Prrenjas, ka marrë përmasa alarmante, duke çuar në bllokimin e plotë të segmentit dhe duke ngritur pikëpyetje të forta mbi cilësinë e investimeve rrugore.
Autoritetet rrugore kanë njoftuar se segmenti problematik do të qëndrojë i mbyllur për një afat të pacaktuar, ndërsa ura në këtë zonë rrezikon seriozisht shembjen. Poshtë saj betoni po thërrmohet, çka tregon një degradim të avancuar të strukturës mbajtëse dhe rrezik real për kolaps.
Fillimisht pritet të ndërmerret një ndërhyrje provizore për stabilizimin e situatës, ndërkohë që paralelisht do të realizohet një studim i plotë gjeologjik i trupit ekzistues të rrugës, me qëllim përcaktimin e zgjidhjes afatgjatë.
Megjithatë, fakti që një aks kombëtar përfundon në këtë gjendje nxjerr abuzime me fondet publike dhe mungesë mbikëqyrjeje në zbatimin e projekteve.
Ndërkohë pasojat në qarkullim janë të menjëhershme. Autokolona autobusësh me kapacitet 40 vende është shtrirë deri në 2–3 kilometra, si në hyrje të Librazhdit ashtu edhe në zonën e Hotolishtit, duke shkaktuar vonesa të konsiderueshme dhe kaos për udhëtarët.
Qytetarët shprehin tension dhe pakënaqësi, pasi ky aks është lidhja kryesore drejt lindjes së vendit dhe një arterie jetike për lëvizjen e njerëzve dhe mallrave.
Në pritje të një vendimmarrjeje përfundimtare për ndërhyrjen afatgjatë, aksi Librazhd–Prrenjas mbetet i paralizuar, ndërsa rreziku i shembjes së urës thellon krizën infrastrukturore dhe dyshimet mbi mënyrën se si janë menaxhuar projektet rrugore ndër vite.
