Pas përfundimit të fjalimit të liderit të opozitës, Sali Berisha, protesta para Kryeministrisë ka kaluar në tensione, në një skenar të ngjashëm me tre tubimet e mëparshme.
Fillimisht, një pjesë e protestuesve hodhën fishekzjarrë dhe molotovë në drejtim të godinës së Kryeministrisë. Policia reagoi duke përdorur autobotin me ujë për të shpërndarë turmën.
Gjatë përplasjes, një prej molotovëve preku edhe mjetin e policisë, por situata u vu nën kontroll brenda pak minutash.
Më pas, protestuesit u zhvendosën drejt godinës së Kuvendit, ku pritet të vijojë tubimi. Në zonë janë vendosur forca të shumta policie për të garantuar sigurinë dhe për të parandaluar incidente të tjera.
Protesta po zhvillohet në kuadër të thirrjes së opozitës për largimin e kryeministrit Edi Rama.
