Seanca e sotme parlamentare u shoqërua me debate mes kreut të grupit parlamentar të PD, Gazment Bardhi, dhe ministres së Jashtme, Elisa Spiropali, lidhur me mënyrën si po funksionon shërbimi diplomatik dhe me procesin e integrimit evropian.
Bardhi akuzoi qeverinë se e ka kthyer Ministrinë e Jashtme në një vend sistemimi për ish-deputetë të mazhorancës.
Sipas tij, një pjesë e mirë e ambasadorëve janë emërime politike dhe jo figura karriere, çka, siç tha, dëmton profesionalizmin e diplomacisë shqiptare.
“Nga ajo që ndodh në praktikë vërejmë që shërbimin e jashtëm e keni kthyer si strehë pensioni për ish-deputetët e PS. Nëse ha p sot listën e ambasadorëve të Shqipërisë, 705 të tyre janë individë politikë që kanë qenë këtu.
Do ta kishim besuar realisht që kjo qeveri ka për qëllim të reformon shërbimin e jashtëm nëse nuk do të kishim vërejtur që në 11 maj ambasadave të Shqipërisë në botë u kthyen në qendra elektorale të PS.
Do ta kishim besuar reformën në shërbimin e jashtëm nëse ministre do vinit këtu dhe nuk të flisnit për sukses imagjinare të politikës së juaj të jashtme me atlete te bardha të kryeministri, por të kishin informuar me seriozitet kuvendin sesi procesi i integrimit është marrë peng nga rasti i korrupsionit të Ballukut. Ju integrimin evropian e keni propagandë të pastër”, tha ndër të tjera Bardhi.
Nga ana tjetër, ministrja Elisa Spiropali tha se Shqipëria ka marrë vlerësime pozitive nga Bashkimi Evropian për reformat e ndërmarra dhe për zbatimin e tyre.
“Nuk presim leksione nga një parti politike që mburojën ndaj korrupsionit nuk e ka mbi kokë por e ka kryetar.
E dyta po të shohësh me vëmendje dhe të jesh mendje hapur sa i takon Shqipërisë në arenën ndërkombëtare, dhe draft raportin do lexosh raportet e BE që të gjitha reformat që ka bërë Shqipëria vlerësohen vijimsisht, vlerësohet zbatimi i tyre, flitet për precedentin e Shqipërisë për hapjen dhe pritshmërinë për mbylljen e negociatave”, tha Spiropali.
