Gjykata e Posaçme Kundër Korrupsionit dhe Krimit të Organizuar (GJKKO) ka mbyllur sot shqyrtimin gjyqësor të dosjes së njohur si “Sterilizimi”, e cila lidhet me koncesionin e shërbimit të sterilizimit të pajisjeve kirurgjikale në spitalet publike. Vendimi përfundimtar për shtatë të akuzuarit do të shpallet më 4 mars 2026, në orën 15:30.
Në qershor të vitit 2025, Struktura e Posaçme Kundër Korrupsionit dhe Krimit të Organizuar (SPAK) kërkoi dënimin me nga 10 vite burg për ish-zëvendësministrin e Shëndetësisë Klodian Rrjepaj dhe biznesmenin Ilir Rrapaj. Pas aplikimit të gjykimit të shkurtuar, dënimi i tyre u reduktua në 6 vite e 8 muaj burg.
Po ashtu, SPAK kërkoi dënimin me 3 vite e 6 muaj burg për ish-zyrtarët Marsela Serjanaj, Sajmir Kadiu dhe Petref Mersini. Në bazë të gjykimit të shkurtuar, dënimet për Serjanaj dhe Kadiu pritet të konvertohen në 2 vite e 4 muaj burg, ndërsa për Mersinin në 4 vite shërbim prove.
Gjatë seancës së fundit, Sajmir Kadiu, ish-drejtorja ekonomike në Ministrinë e Shëndetësisë, deklaroi se ka kaluar tashmë tre vite në masën e sigurisë “arrest në shtëpi”. Ai theksoi se kjo periudhë është më e gjatë se dënimi i kërkuar nga prokuroria, duke e cilësuar masën si joproporcionale. Kadiu shtoi se është ankuar në Gjykatën e Apelit dhe në Gjykatën e Lartë, por pa rezultat.
Ndërkohë, për mjekun Arben Gjata, dënimi prej 1 vit e 4 muaj burg pritet të konvertohet në 3 vite shërbim prove. Për Genc Byrazerin dhe Naile Ajazin, SPAK ka kërkuar nga 2 vite shërbim prove secili.
Ish-ministri i Shëndetësisë Ilir Beqaj po gjykohet veçmas me procedurë të zakonshme, jashtë kësaj pjese të dosjes që u mbyll sot shqyrtimi. Vendimi i GJKKO pritet të jetë një nga më të rëndësishmit në kuadër të hetimeve për koncesionet në shëndetësi, duke tërhequr vëmendjen e opinionit publik.
